Shvetsiyadagi saylovlarda o‘ng partiyalar bloki yetakchilik qilmoqda

Shvetsiyadagi parlament saylovlarida Mo‘’tadil koalitsiya partiyasi yetakchisi Ulf Kristersson atrofida tuzilgan to‘rtta o‘ng qanot partiya bloki kichik farq bilan yetakchilik qilmoqda. Shvetsiyaning SVT telekanali 11 sentabr, yakshanba kuni kechqurun e’lon qilingan ovoz berishning dastlabki natijalariga ko‘ra, saylov byulletenlari deyarli 80 foizi sanab chiqilgach, ushbu saylovoldi koalitsiya ishtirokchilari birgalikda parlamentdagi 349 o‘rindan 175 tasini qo‘lga kiritishlari mumkin.

Avvalroq, bosh vazir Magdalena Andersson va uning Sotsial-demokratik partiyasi atrofidagi so‘l-markaziy blok kichik farq bilan saylovda yetakchilik qilayotgani xabar qilingandi. 

Sotsial-demokratik partiya, SVT tomonidan e’lon qilingan ma’lumotlarga ko‘ra, 30,5 foiz ovoz va parlamentdagi 108 o‘rinni qo‘lga kiritmoqda. Yimmi Okessonning «Shvetsiya demokratlari» partiyasi 20,7 foiz ovoz, ya’ni 74 mandat bilan ikkinchi o‘rinda. 

Agar o‘ng qanot bloki saylovlarda g‘alaba qozonsa, bir vaqtlar marginal bo‘lgan o‘ng qanot populistik «Shvetsiya demokratlari» partiyasi birinchi marta Skandinaviya qirolligi hukumatiga kirishi mumkin bo‘ladi. Saylovda ishtirok etib, an’anaviy o‘ng qanot partiyalari – konservativlar, liberallar va xristian-demokratiklar o‘ta o‘nglar ko‘magida mamlakatni boshqarishga tayyor ekanliklarini bildirgandi.

Mutaxassislarning fikricha, migratsiya siyosatini qat’iylashtirish tarafdori bo‘lgan «Shvetsiya demokratlari»ning ommalashib borayotgani Shvetsiyaga migratsiya oqimining kuchayishi bilan bir vaqtga to‘g‘ri kelgan. Aholisi 10 milliondan sal kam bo‘lgan bu Skandinaviya davlati so‘nggi o‘n yil ichida yarim millionga yaqin boshpana so‘ragan shaxsni qabul qilgan. 

Bu yilgi saylovlar kun tartibida migratsiya masalalari muhim o‘rin tutdi. Bundan tashqari, shved saylovchilari jinoyatchilik va elektr narxining oshishi bilan bog‘liq mavzularga e’tiborni kuchaytirdi. Shu bilan birga, Shvetsiyaning NATOga qo‘shilishi masalasi, aftidan, elektoratni yuqoridagi muammolardan ko‘ra kamroq tashvishlantirgan. 

Shvetsiyadagi parlament saylovlari arafasida DW nashriga bergan intervyusida AQShning Germaniyadagi Marshall jamg‘armasi katta ilmiy xodimi Jyeykob Fanka Kirkegor saylovlardagi haqiqiy xatar «agar na so‘llar, na o‘ng partiyalar ko‘pchilik o‘rinni qo‘lga kirita olmasa, Shvetsiya uzoq vaqt hukumatsiz qolishi, hattoki yangi saylovlar ham e’lon qilinishi mumkinligi»dan iborat bo‘lganini aytgandi.