Germaniya Belarusni futbol bo‘yicha YeCh saralashidan chetlatishni so‘radi

Germaniya ichki ishlar vaziri, xususan, sport bilan bog‘liq masalalar uchun mas’ul Nensi Fezer Belarus terma jamoasini Germaniyada bo‘lib o‘tadigan futbol bo‘yicha 2024 yilgi Yevropa chempionati saralash bosqichida ishtirok etishdan chetlashtirishga chaqirdi. Fezer Yevropa futbol assotsiatsiyalari ittifoqi (UYeFA) rahbari Aleksander Cheferinga tegishli so‘rov bilan xat yo‘lladi. AFP agentligiga 16 sentabr, juma kuni xabar yuborilganini vazirlik vakili tasdiqladi. Maktub haqida ilk bor Germaniyaning Der Spiegel jurnali xabar bergan.
 
Fezer «barcha xalqaro futbol o‘yinlari va turnirlaridan nafaqat xalqaro huquqni buzgan holda tajovuzkor urush olib borayotgan Rossiyani, balki Rossiya rahbariyatining asosiy yordamchisi sifatida Belarusni ham olib tashlashni» talab qilmoqda. Vazir so‘zlariga ko‘ra, futbol jamoatchiligi «o‘z mas’uliyatli roliga mos kelishi va inson huquqlarini mensimaslikning Moskva va Minsk namoyish qilayotgan ko‘rinishiga qarshi birdamlik bilan turishi» kerak. Davlatlarning qonunbuzilishiga mas’ul sportchilar «sport bilan shug‘ullanish, ta’sir qilish yoki boshqa yo‘l bilan vakillik qilish imkoniyatidan mahrum bo‘lishi kerak», dedi Nensi Fezer. 

Vazir, shuningdek, Rossiya va Belarus rasmiylarini xalqaro sport federatsiyalarining nufuzli organlaridagi lavozimlaridan chetlashtirishni talab qilmoqda. 

9 oktyabr kuni Frankfurt-Maynda Yevro-2024 saralashiga qur’a tashlash marosimi bo‘lib o‘tadi. Der Spiegel eslatishicha, Rossiya terma jamoasi va Rossiya klublari bahordan boshlab xalqaro futbol turnirlarida ishtirok etishdan chetlatilgan. 

Ayni paytda, Rossiya va Belarus sportchilari hali ham barcha xalqaro biatlon musobaqalariga kiritilmayapti. Bunday qaror Xalqaro biatlon ittifoqi (IBU) tomonidan 16 sentabr kuni Zalsburgda bo‘lib o‘tgan kongressda qabul qilindi. 

Shu tariqa, rahbariyatning 1 martdan beri amalda bo‘lgan sanksiyalarni uzaytirish haqidagi iltimosi qo‘llab-quvvatlandi. Rejim keyingi ogohlantirishgacha saqlanib qoladi. Rossiya va Belarus milliy federatsiyalari Moskvaning Ukrainadagi urushidan aniq uzoqlashmaguncha chetda qoladi. 

Shu bilan birga, Xalqaro olimpiya qo‘mitasi rahbari Tomas Bax Xalqaro biatlon ittifoqi kongressiga yo‘llagan videomurojaatida ruslarni chetlashtirish atrofidagi muammoni «hal qilishini» aytdi. «Men hech qanday aniq qadamlar yoki muddatlarni e’lon qila olmayman», deya qo‘shimcha qildi u. 

Avvalroq, avgust oyi o‘rtalarida kanadalik huquq professori, Butunjahon antidoping agentligi (WADA)ning Rossiya hukumati idoralarining 2014 yil Sochida bo‘lib o‘tgan Olimpiada o‘yinlaridagi doping firibgarligi haqidagi ayblovlarini tekshirish bo‘yicha komissiyasi sobiq rahbari Richard Maklaren Rossiya va Belarus sportchilari xalqaro musobaqalarda ishtirok etishdan chetlatilganiga qarshi chiqdi.

Kanadalik sportchilar o‘z mamlakatlari siyosati uchun mas’ul deb hisoblanganini tanqid qildi: «Sportchilar bu mojaroning tashabbuskori bo‘lmagan va uning uchun javobgar emas. Bu ularning yana ishtirok etishiga ruxsat berish uchun ikkita yaxshi sababdir».

Richard Maklaren bir qator rossiyalik va belaruslik sportchilar musobaqalarda qatnashish huquqini himoya qilish uchun Xalqaro sport arbitraj sudiga (CAS) murojaat qilishini kutgandi. «Agar CAS sportchilar foydasiga qaror qilsa, federatsiyalar ularga yana musobaqalarda qatnashishiga ruxsat berishga majbur bo‘ladi», dedi u. Huquqshunos ruslar va belaruslarning suddagi imkoniyatlari haqida gapirishni istamadi va ularning ishi bo‘yicha qaror har qanday bo‘lishi mumkinligini qo‘shimcha qildi.