17:34 / 28.09.2022
13149
АҚШ ўз фуқароларини Россияни зудлик билан тарк этишга чақирди
Фото: Getty Images

Сафарбарлик фонида Россияни тарк этиш имкониятлари тобора камайиб бормоқда, дея огоҳлантирди АҚШ Давлат департаменти. Унинг таъкидлашича, икки фуқаролиги бўлган шахслар Украина билан уруш учун армияга чақирилиши мумкин.

АҚШ Давлат департаменти Америка фуқароларига Россияни зудлик билан тарк этишни тавсия қилди. 28 сентябр, чоршанба куни АҚШнинг Москвадаги элчихонаси сайтида эълон қилинган мурожаатда Давлат департаменти 21 сентябр куни Россияда «қисман сафарбарлик» эълон қилингани ва икки фуқароликка эга бўлганлар армияга чақирилиб, Украина билан урушга юборилиши мумкинлигини эслатган.

«Россия икки фуқаролиги бўлган шахсларни АҚШ фуқаролигини тан олишни рад этиши, уларга АҚШ консуллик ёрдамини олишдан бош тортиши, Россиядан чиқиб кетишига йўл қўймаслиги ва икки фуқароликка эга шахсларни ҳарбий хизматга чақириши мумкин», — дейилади ҳужжатда. 

Давлат департаменти, шунингдек, Россияни тарк этиш имкониятлари тобора камайиб бораётгани ҳақида огоҳлантирди. «Россиядан бошқа давлатларга жуда чекланган миқдордаги рейслар мавжуд ва улар учун чипталар кейинги саналар учун мавжуд бўлмаслиги мумкин, аммо қуруқликдаги чегаралар ҳали ҳам автомобиль ва автобусда кесиб ўтиш учун очиқ. Агар сиз Россияни тарк этишни истасангиз, унда мустақил чоралар кўришингиз керак», деди Давлат департаменти ва АҚШ элчихонасининг ватандошларга саёҳат қилишда ёрдам бериш қобилияти янада чекланиши мумкинлигини тушунтирди. 

АҚШ ташқи сиёсат идораси, шунингдек, фуқароларни Россияга саёҳат қилишдан тийилишга, Россияда бўлган америкаликларни «ҳар қандай сиёсий ёки ижтимоий норозиликлардан» қочишга, хавфсизлик ходимларини суратга туширмасликка чақирди, чунки Россия расмийлари намойишларда қатнашган АҚШ фуқароларини аввал ҳам қўлга олган.

Мавзуга оид
Top