Belarusdagi guruh tarkibiga 9 ming rossiyalik kiradi

Belarusdagi qo‘shma mintaqaviy kuchlar guruhi deyarli to‘qqiz ming rossiyalik harbiyni o‘z ichiga oladi. Bu haqda 16 oktyabr, yakshanba kuni Belarus Mudofaa vazirligining xalqaro harbiy hamkorlik bo‘limi boshlig‘i Valeriy Revenko TASS axborot agentligiga ma’lum qildi. Uning so‘zlariga ko‘ra, rossiyalik harbiy xizmatchilardan iborat birinchi eshelonlar allaqachon Belarusga kela boshlagan, «qayta joylashtirish bir necha kun davom etadi».

Bundan tashqari, Belarus Mudofaa vazirligi mintaqaviy qo‘shinlar guruhining aviatsiyasi mamlakatga Rossiyadan kela boshlaganini ta’kidladi.

10 oktyabr kuni Belarus rahbari Aleksandr Lukashenko va Rossiya prezidenti Vladimir Putin qo‘shma mintaqaviy qo‘shinlar guruhini joylashtirishga kelishib oldilar. Lukashenkoning so‘zlariga ko‘ra, Ukraina go‘yoki Belarusga zarba berishni rejalashtirgan va Belarus chegarasida ikkinchi frontni ochish jarayoni allaqachon boshlangan. Bundan tashqari, u Polsha va Boltiqbo‘yi davlatlari o‘z qo‘shinlarini Belarus bilan chegarada to‘plashayotganini aytdi.

O‘z navbatida, Belarus Qurolli kuchlari Bosh shtabi boshlig‘ining o‘rinbosari Viktor Tumar mintaqaviy guruhning asosini «tinchlik davridagi shtat bo‘yicha» Belarus bo‘linmalari, shuningdek Rossiyaning alohida tuzilmalari tashkil etishini aytdi. Belarus Mudofaa vazirligi matbuot kotibi Minskning Ittifoq davlati qo‘shinlarini birlashtirish «faqat mudofaa loyihasi» degan gapini takrorladi. Ayni paytda, urush boshlanganidan beri Rossiya Ukrainaga zarba berish uchun Belarus hududidan foydalanmoqda.