Navoiyda maktab direktori o‘quvchini urgani aytilmoqda. Holat yuzasidan tergovga qadar tekshiruv harakatlari boshlangan

Ijtimoiy tarmoqlarda Navoiy shahridagi 11-AFChO‘IM direktori 10-sinf o‘quvchisini urgani va o‘quvchi qiz hushini yo‘qotgani aytilgan videolavha tarqaldi. Holat yuzasidan Navoiy viloyati prokuraturasi rasmiy bayonot berdi.

Ma’lum qilinishicha, fuqaro X.J. Navoiy shahar IIBga qizi, 2006 yilda tug‘ilgan G‘.N.ni Navoiy shahridagi 11-AFChO‘IM direktori urib, tan-jarohati yetkazganligi yuzasidan murojaat qilgan.

“Holat yuzasidan Navoiy shahar IIB tomonidan tergovga qadar tekshiruv harakatlari olib borilayotgan bo‘lib, sud-tibbiyot ekspertizasi tayinlangan. Tekshirish harakatlari Navoiy viloyati prokuraturasi tomonidan nazoratga olindi”, — deyiladi prokuratura bayonotida.

Kun.uz manbasiga ko‘ra, holat sodir bo‘lgach, maktabga “Tez tibbiy yordam” chaqirilgan. O‘quvchi qizga tibbiy yordam ko‘rsatgan shifokor ma’lumotnomaga “Ko‘krak qafasi chap tomonining lat yeyishi”, deya tashxis yozgan.

Ijtimoiy tarmoqlarda tarqalgan videolavhada maktab direktori qo‘lida katta uzuk bo‘lganligini ko‘rish mumkin.

Oldinroq Urgutda 6-sinf o‘quvchisini urib, quloq pardasini yirtib yuborgan direktorga chora ko‘rilgandi.