Navoiy shahriga yangi hokim tayinlandi. Bu haqda Navoiy viloyati hokimligi axborot xizmati xabar berdi.
Maʼlum qilinishicha, Navoiy viloyati hokimining 2026-yil 13-oktabrdagi tegishli qaroriga asosan Islomov Bobir Husnidinovich Navoiy shahar hokimi etib tayinlangan.
Tayinlovga qadar u “Hududiy elektr tarmoqlari” AJ boshqaruvi raisining elektr tarmoqlaridan foydalanish boʻyicha birinchi oʻrinbosari lavozimida faoliyat yuritgan.
Bobir Islomov 1981-yilda Navbahor tumanida tugʻilgan. U 2003-yilda Navoiy davlat konchilik institutini, 2005-yilda Buxoro oziq-ovqat va yengil sanoat texnologiyasi institutini, 2012-yilda esa Oliy biznes maktabini tamomlagan.
Navoiy shahriga 2023-yil iyul oyidan buyon Dilmurod Ergashev rahbarlik qilib kelayotgandi. Uning lavozimdan olinish sababi keltirilmagan.
Prezident 21-iyul kuni yilning birinchi yarmida erishilgan natijalar va yil yakunigacha qilinadigan ishlar muhokamasiga bagʻishlangan videoselektor yigʻilishida bosh vazirga 17 nafar hokimning lavozimiga loyiqligini koʻrib chiqishni topshirgandi. Roʻyxatda Navoiy shahri hokimi ham bor edi.
