Janubiy Koreya hukumati Hellouinda yuz bergan fojiada xatolarini tan oldi

1 noyabr kuni Janubiy Koreya politsiyasi boshlig‘i Yun Xi Kyun Seulning Itevon tumanida Hellouin bayramini nishonlash chog‘ida amaldorlarning xatolarini birinchi bo‘lib tan oldi va uzr so‘radi.

U «jamoat xavfsizligi ta’minlanmagani uchun cheksiz mas’uliyatni» his qilayotganini va shu kechada olomon nazorati «yetarlicha bo‘lmaganini» aytdi. Yun so‘zlariga ko‘ra, halokatli tiqilinchdan oldin, favqulodda yordam telefon raqamiga bir nechta qo‘ng‘iroqlar bo‘lgan.

Masalan, tez yordam xizmatiga birinchi qo‘ng‘iroq mahalliy vaqt bilan soat 18:34 da, halokatli tiqilinch boshlanishidan bir necha soat oldin qilingan. Keyingi uch yarim soat ichida esa yana 10 ta qo‘ng‘iroq bo‘lgan.

Yun Xi Kyun so‘zlariga ko‘ra, ushbu tadbir tashkilotchi tomonidan rasman ro‘yxatdan o‘tkazilmagani bois, na politsiyaga, na mahalliy hokimiyatga olomonni oldindan boshqarish vazifasi qo‘yilmagan va ularning reaksiyasi ham yetarli bo‘lmagan.

«Tadbir tashkilotchisi kim bo‘lganini izlashdan ko‘ra, odamlar xavfsizligi muhimroq va biz ehtiyot choralarini ko‘rishimiz kerak edi», dedi prezident Yun Sok Yol o‘z navbatida.

Politsiya Hellouin fojiasini tekshirish uchun 475 kishidan iborat tezkor guruh tuzdi. Janubiy Koreya politsiyasi boshlig‘i iste’foga chiqishi haqidagi savolga javob bermadi, ammo tergovni puxta o‘tkazishga va’da berdi.

Ichki ishlar vaziri Li San Min ham 156 kishi halok bo‘lgan va 152 kishi jarohat olgan voqea uchun fuqarolardan uzr so‘radi.

Eslatib o‘tamiz, 29 oktyabr kuni Seulning mashhur Itevon hududida odamlar so‘nggi uch yil ichida birinchi marta Hellouin bayramini nishonlash uchun yig‘ilgan edi. Olomon tor ko‘cha orqali o‘tmoqchi bo‘lganida, juda katta tiqilinch yuz berdi. Oqibatda ko‘plab odamlar, asosan yoshlar tiqilinchda bo‘g‘ilib qolishdi. 

Fojia qurbonlari orasida O‘zbekiston fuqarosi ham borligi aytildi.