OTM talabasi hamda bitiruvchisini ishga qabul qilgan tadbirkorga subsidiya beriladi

Prezidentning “Muayyan tajriba va yutuqlarga erishgan tadbirkorlar “ustoz-shogird” an’analari asosida hududlardagi yosh tadbirkorlarga ko‘maklashishini rag‘batlantirish chora-tadbirlari to‘g‘risida”gi qarori loyihasi e’lon qilindi.

Shunday tartib o‘rnatiladiki, unga muvofiq 2023 yil 1 yanvardan boshlab, “Yoshlar daftari” jamg‘armalari mablag‘lari hisobidan o‘rta maxsus ta’lim tashkilotlari bitiruvchilari, oliy ta’lim tashkilotlari 3- va 4-kurs talabalari hamda bitiruvchilarini ishga qabul qilgan ish beruvchilarga (budjet tashkilotlari, davlat korxonalari, ustav jamg‘armasi (kapitali)da davlat ulushi 50 foiz va undan ortiq bo‘lgan yuridik shaxslar bundan mustasno) har bir xodim uchun bir yil davomida har oyda bazaviy hisoblash miqdorining 9 baravari miqdorida subsidiya beriladi;

Bunda, mazkur subsidiya har bir bitiruvchi (talaba) ga nisbatan qo‘shimcha ravishda 10 nafar xodimga ega ish beruvchilarga nisbatan qo‘llaniladi.

Prezidentning “Yoshlar tadbirkorlik faoliyatini qo‘llab-quvvatlash va bandligiga ko‘maklashish, ularni ijtimoiy himoya qilish hamda bo‘sh vaqtini mazmunli tashkil etishga oid qo‘shimcha chora-tadbirlar to‘g‘risida”gi farmoni 1-bandi “a” kichik bandi ikkinchi xatboshisida belgilangan imtiyoz amal qilish muddati 2025 yil 31 dekabrga qadar uzaytiriladi.

Moliya vazirligi 2023 yildan boshlab mazkur qarorda yoshlar bandligiga ko‘maklashish va ular ijtimoiy himoyasini kuchaytirish bo‘yicha nazarda tutilgan chora-tadbirlarni moliyalashtirish uchun Yoshlar ishlari agentligi hisob-kitoblariga muvofiq agentlikka Davlat budjetidan qo‘shimcha ravishda mablag‘lar ajratilishini hamda kelgusi yil budjet parametrlarini shakllantirishda ushbu xarajatlar nazarda tutilishini ta’minlaydi.

Savdo-sanoat palatasi Yoshlar ishlari agentligi hamda Moliya vazirligi bilan birgalikda “Yoshlar daftari” jamg‘armalari mablag‘lari hisobidan yuqoridagi toifadagi shaxslarni ishga qabul qilgan ish beruvchilarga subsidiya berish tartibi to‘g‘risidagi hukumat qarori loyihasini Vazirlar Mahkamasiga kiritadi.