Video: Buxoroda o‘qituvchi boshlang‘ich sinf o‘quvchilarini kaltakladi

Kun.uz tahririyatiga Buxoro shahrida joylashgan 4-sonli maktabning boshlang‘ich sinf o‘qituvchisi o‘quvchilarini kaltaklayotgani aks etgan video kelib tushdi.

Uch daqiqalik videoda ko‘rish mumkinki, o‘qituvchi berilgan vazifani tekshirish davomida 3-D sinf o‘quvchilarini ayovsiz kaltaklagan. Manbaning aytishicha, pedagog bu ishni birinchi marta qilayotgani yo‘q, bu holat har darsda takrorlanadi.

«Ota-onalar bundan shikoyat qilib o‘qituvchilar bilan ham gaplashishgan, ammo o‘qituvchi hech kimning qo‘lidan hech narsa kelmasligini aytgan», – deydi manba.

Bundan tashqari, pedagog bolalarni pul topib kelish uchun darsdan chiqarib yuborayotgani ham aytilmoqda.

So‘nggi vaqtlarda O‘zbekistonda shu kabi bir necha holat kuzatildi. Xususan, shu yil oktyabr oyida Namangan viloyatida o‘qituvchi o‘quvchini kaltaklagandi. Keyinroq esa unga jinoyat ishi qo‘zg‘atilgandi.

Aprel oyida esa Surxondaryo viloyati Bandixon tumanida 4-maktabning ingliz tili fani o‘qituvchisi 9-sinf o‘quvchisini dars mashg‘ulotlariga tayyorgarlik ko‘rmay kelgani uchun urib, tepgani ma’lum bo‘lgandi.