YUNISEF: Homilador va emizikli ayollar orasida to‘yib ovqatlanmaslik darajasi ortmoqda

Inqirozga uchragan mamlakatlarda so‘nggi yillarda to‘yib ovqatlanmaslikdan aziyat chekayotgan yosh ayollar soni keskin oshdi. Bu haqda Birlashgan Millatlar Tashkilotining Bolalar jamg‘armasi (YuNISEF)ning 7 mart, seshanba kuni Xalqaro xotin-qizlar kuni arafasida e’lon qilingan hisobotida aytiladi. 

Hisobotga ko‘ra, global oziq-ovqat va ovqatlanish inqirozidan eng ko‘p zarar ko‘rgan 12 mamlakatda 6,9 million homilador va emizikli qiz va ayollar to‘yib ovqatlanmaslikdan aziyat chekmoqda. Bu 2020 yilga nisbatan 25 foizga ko‘p, o‘shanda bu ko‘rsatkich 5,5 mln edi. 

Bu davlatlar, jumladan Afg‘oniston, Burkina-Faso, Yaman, Keniya, Mali, Niger, Nigeriya, Somali, Sudan, Chad, Efiopiya va Janubiy Sudan «Ukrainadagi urush va davom etayotgan qurg‘oqchilik, ayrim mamlakatlardagi ziddiyat va beqarorlik tufayli kuchaygan global oziq-ovqat inqirozining episentrini ifodalaydi», deb yozadi YUNISEF. 

Hisobotda qayd etilishicha, butun dunyo bo‘ylab bir milliarddan ortiq qiz va ayollar to‘yib ovqatlanmaslik, tana vaznining kamligi va bo‘yi pastligi, shuningdek, muhim mikroelementlar tanqisligi va kamqonlikdan aziyat chekmoqda, bu ularning hayoti va farovonligi uchun halokatli oqibatlarga olib keladi.