Buyuk Britaniya va O‘zbekiston o‘rtasida ingliz tilini baholash bo‘yicha tajriba va ilg‘or amaliyot almashinuvi

Britaniya Kengashi, Buyuk Britaniyaning madaniy aloqalar va ta’lim imkoniyatlari bo‘yicha xalqaro tashkiloti O‘zbekiston Respublikasi Oliy ta’lim, fan va innovatsiyalar vazirligi hamda Maktabgacha va maktab ta’limi vazirligi bilan hamkorlikda ingliz tilini baholash mavzusida konferensiya tashkil etildi. Tadbir O‘zbekiston davlat jahon tillari universitetida o‘tkazildi.

Davlatimiz rahbari tomonidan «Insonga e’tibor va sifatli ta’lim yili» deb e’lon qilingan 2023 yilda «New Directions Series» ingliz tilini bilish darajasini baholash borasida O‘zbekistonda o‘tkazilgan konferensiya chet tilini bilish darajasini baholash maktab va oliy o‘quv yurtlarida ta’lim sifati va islohotlariga qanday ta’sir ko‘rsatishi kabi mavzularni muhokama qilish maydoniga aylandi.

Ushbu tadbirda soha bo‘limlari vakillari, tilshunoslar, ta’lim muassasalari rahbarlari va ilmiy xodimlardan iborat 250 nafar ekspert ishtirok etdi. Anjumanda O‘zbekistonda va xalqaro miqyosda ingliz tilini baholash, tendensiyalari, yondashuvlar nuqtai nazari va tushunchalari taqdim etildi.

Denis Voddingem, Britaniya Kengashining O‘zbekistondagi direktori:

«Biz mahalliy, mintaqaviy va xalqaro siyosatchilarni, o‘qituvchilarni, olimlarni va baholash bo‘yicha mutaxassislarni Toshkentdagi «New Directions Series» konferensiyasiga ishtirok etish uchun kelganlaridan mamnunmiz. Bu yerda biz o‘zaro tarmoq o‘rnatish, almashish va shu yo‘nalishda ilg‘or ishlanmalar bilan bo‘lishish uchun dinamik maydonni taqdim etamiz.

«New Directions Series» - til sinovi va baholash bo‘yicha Britaniya Kengashining flagmani, shuningdek, «Til ta’limi islohotiga kompleks yondashuv», «Potensialni ro‘yobga chiqarish: siyosat, o‘zaro aloqalar va ta’sir», «21-asrda ish, o‘qish va shaxsiy ehtiyojlar uchun ingliz tili» va «Ingliz tilini amaliyot va sifatni baholash mahsulotlari orqali o‘qitish sifatini ta’minlash» mavzulari doirasida o‘tkaziladigan konferensiya hisoblanadi. Biz ta’lim tizimlarida ingliz tilini baholash sohasidagi ilg‘or ishlanmalar va tajriba almashish uchun noyob platforma yaratishni maqsad qilgan edik».

O‘zbekiston Respublikasi Oliy ta’lim, fan va innovatsiyalar vazirligi Ta’lim muassasalari faoliyatini tahlil qilish boshqarmasi boshlig‘i Sherzod Ne’matov:

 «Ayni paytda O‘zbekiston Respublikasi Prezidenti Shavkat Mirziyoyev tashabbusi bilan oliy o‘quv yurtlari professor-o‘qituvchilari va talabalarining ingliz tilini bilish darajasini oshirish maqsadida oliy ta’lim sohasida qator islohotlar amalga oshirilmoqda. Bu masala davlat siyosatining eng ustuvor vazifalaridan biri darajasiga ko‘tarildi. Mamlakatimizda ilm-fan va ta’limni yanada rivojlantirishga salmoqli hissa qo‘shayotgan xalqaro ta’lim tashkilotlari bilan hamkorlikni mustahkamlash biz uchun muhim.

Shu ma’noda mazkur anjuman til ta’limi sohasida olib borilayotgan islohotlar, o‘qitish, o‘rganish va tilni baholashga kompleks yondashuvni joriy etishda muhim voqea bo‘ldi.»

#NewDirectionsSeriesUzbekistan

 Batafsil ma’lumot uchun www.britishcouncil.uz/uz/programmes/new-directions-series-2023

Britaniya Kengashi haqida

Britaniya Kengashi Buyuk Britaniyaning madaniy aloqalar va ta’lim imkoniyatlari bo‘yicha xalqaro tashkilotidir. Biz Buyuk Britaniya va butun dunyodagi odamlar o‘rtasida aloqalar, o‘zaro tushunish va ishonchni o‘rnatish orqali tinchlik va farovonlikni qo‘llab-quvvatlaymiz. Biz bularning barchasini san’at va madaniyat, ta’lim va ingliz tilidagi faoliyatimiz orqali amalga oshiramiz. Bizning tashkilot 200 dan ortiq mamlakat va hududlardagi odamlar bilan ishlaydi va 100 dan ortiq mamlakatlarda faoliyat yuritadi. 2021-2022 yillarda tashkilot 650 million nafar kishiga yetdi. www.britishcouncil.org

Reklama