«Lotoklar katta suv oqimini qabul qilishga mo‘ljallanmagan» - Toshkentni suv bosganiga shahar hokimligi izoh berdi

«2 aprel kuni 2 soat davomida kuzatilgan kuchli yog‘ingarchilik natijasida 20 mm yomg‘ir yog‘di va bu aprel oyi uchun belgilangan umumiy me’yorning, ya’ni 60 mmning uchdan bir qismiga teng. Lotoklar bir paytning o‘zida bunday katta oqimni qabul qilishga mo‘ljallanmagani bois, shahrimizdagi bir necha manzilgohlarda suv to‘planishi kuzatildi», — deyiladi rasmiy bayonotda.

Hokimlik holatni bartaraf etish uchun Toshkent shahar Obodonlashtirish bosh boshqarmasi va uning tuman boshqarmalari, kommunal soha tizimlari, Favqulodda vaziyatlar boshqarmasi, Ichki ishlar bosh boshqarmasining 500 dan ortiq xodimlari va 100 dan ortiq maxsus texnikalari jalb etilgani va 2 aprel 23:00 gacha suv toshgan manzillardagi holatlarga barham berilganini qayd etgan.

Ta’kidlash joiz, «Toshkent metropoliteni» suv ketish yo‘llari (ariqlar)ning to‘lib qolgani uchun metro bekatlari suvga to‘lganini ma’lum qilgandi.