Italiya migrantlar oqimi tufayli olti oy muddatga favqulodda holat rejimini e’lon qildi. Eng ko‘p jabrlangan janubiy hududlarga 5 million yevro miqdorida yordam ko‘rsatiladi. Mamlakat hukumati Yevropa Ittifoqidan aralashuvni so‘ramoqda.
Italiya hukumati muhojirlar oqimi ko‘pligi sababli mamlakatda favqulodda holat rejimini e’lon qildi. Mamlakatning eng ko‘p jabrlangan janubiy hududlariga 5 million yevro miqdorida yordam ko‘rsatiladi. Bu haqda 11 aprel, seshanba kuni Italiyaning ANSA agentligi tomonidan tarqatilgan ma’lumot bosh vazir Jorja Meloni idorasida tasdiqlandi. Bu mablag‘lar, jumladan, yangi qochqinlarni qabul qilish markazlarini ochishga sarflanadi. Favqulodda holat davrida bunday markazlarni ochish osonroq bo‘ladi - ammo noqonuniy migrantlarni deportatsiya qilish tartibi ham soddalashtiriladi.
Biroq, Italiya fuqarolik mudofaasi va dengiz siyosati vaziri Nello Musumechi ko‘rilgan choralar yetarli emasligini aytdi. U mamlakatdagi migratsiya inqirozini hal qilish uchun Yevropa Ittifoqining «mas’uliyatli aralashuvi»ga chaqirdi.
Rasmiy ma’lumotlarga ko‘ra, yil boshidan beri Italiyaga 31 mingdan ortiq noqonuniy muhojir kelgan. O‘tgan yilning shu davrida ular bor-yo‘g‘i 7900 ga yaqin edi. Qochqinlar Tunis va Liviyadan O‘rta Yer dengizi orqali janubiy Italiya va Maltaga o‘tishga harakat qilmoqda, shu jumladan yaroqsiz qayiqlarda - buning natijasida ularning sezilarli qismi halok bo‘lyapti.
Italiya bosh vaziri Jorja Meloni fevral oyida hukumat keyingi falokatlarning oldini olish uchun noqonuniy migratsiyani to‘xtatishga qaror qilganini aytdi.
