Samarqandda gazballoni portladi

Kun.uz’ga navbatdagi murojaat Samarqand viloyati Paxtachi tumanidan bo‘ldi. Murojaatda yozilishicha, joriy yil 25 aprel kuni tumanning «Chorgo‘sha» MFYda yashovchi Xosiyat Muhammadiyevaning xonadonida gazballon portlagan.

Oqibatda, oshxona sifatida foydalanib kelingan bino shikastlangan. Shuningdek, ayolning qo‘shnisi tan jarohatlari bilan shifoxonaga yotqizilgan.

Murojaatchilar hodisa sodir bo‘lishiga nosoz gazballoni sabab bo‘lganini aytishmoqda. 25 aprel kuni tuman gaz idorasi xodimlari mahallada gazballoni tarqatgan va X.Muhammadiyevaga gaz sizib chiqib turgan balloni berib ketishgan. Oshxonaga olib kirib qo‘yilgan gazballonidan gaz sizib chiqqan va oqibatda portlash sodir bo‘lgan.

«O‘sha kuni gazballonlarini tarqatgan tuman gaz idorasi xodimlari X.Muhammadiyevaga gazballonni bergan va tezda ketib qolgan. Murojaat qilinganiga qaramasdan na mahalla, na tuman gaz idorasi ayolga amaliy yordam bergan», deyiladi murojaatda.

So‘nggi paytlarda aynan nosoz gazballonlari bilan bog‘liq murojaatlar ko‘paydi. Murojaatlarning aksariyatida aholiga tarqatish uchun olib borilayotgan gazballonlarning bir qismi nosozligi va ulardan gaz sizib chiqishi, biroq gaz idorasi xodimlari holatni bila turib ularni odamlarga berib ketayotgani aytiladi.

Paxtachida sodir bo‘lgan hodisani va nosoz gazballonlarni tarqatish bilan bog‘liq muammoni tegishli tashkilotlar o‘z nazoratiga olishini kutib qolamiz.