Oliy Majlis va YeIning “Inter Pares” global dasturi o‘rtasida hamkorlik bo‘yicha loyiha yo‘lga qo‘yiladi

Toshkent shahrida mazkur loyihaning rasmiy boshlanishiga bag‘ishlangan anjuman o‘tkazildi. Loyihada ishtirok etgan 17 ta davlatning qonun chiqaruvchi organi orasida Oliy Majlis Markaziy Osiyo mintaqasi va butun MDH makonidagi mamlakatlardan yagona parlamentga aylangan.

Anjumanda Senat raisi Tanzila Norboyeva Oliy Majlisning Yevropa Ittifoqiga a’zo mamlakatlar parlamentlari bilan aloqalar konstruktiv ruhda rivojlanib borayotgani, munosabatlarni amaliy loyihalar bilan boyitish muhim ahamiyatga ega ekanini bildirgan.

“O‘zbekiston Yevropa Ittifoqini asosiy xalqaro hamkor deb biladi. Biz parlament diplomatiyasi sohasidagi sa’y-harakatlarni izchil amalga oshirish bo‘yicha hamkorlikni davom ettirishga tayyormiz. Anjuman yakunlari bo‘yicha parlament salohiyatini yanada rivojlantirish va rolini kuchaytirish bo‘yicha foydali tavsiyalar ishlab chiqiladi, shuningdek, ilg‘or amaliyotlar va tajriba almashish imkoniyatiga ega bo‘lamiz”, — deya ta’kidlagan Senat Raisi.

O‘z navbatida, Yevropa Ittifoqining O‘zbekistondagi delegatsiyasi rahbari Sharlotta Adrian “Inter Pares” loyihasining Markaziy Osiyo davlatlari orasida aynan yagona hamkor sifatida O‘zbekiston parlamenti bilan amalga oshirilayotganiga to‘xtalib, keyingi yillarda mamlakatda inson huquqlarini ta’minlash, majburiy mehnatga barham berish va boshqa yo‘nalishlardagi islohotlar va ularning natijalari bilan izohlanishini aytgan.

Sessiyalarga bo‘lingan holda o‘z ishini davom ettirgan anjumanda hamkor mamlakatlar parlamentlari tajribasi ham o‘rganilgan. Tadbirning ikkinchi kunida esa ishtirokchilar mahalliy budjet ijrosini nazorat qilish, “elektron parlament” tizimini joriy etish, gender tenglikni ta’minlash, yoshlar bilan ishlash kabi mavzularda o‘zaro fikr almashganlar.