JSST rahbari «O‘zbekiston sog‘liqni saqlash a’lochisi» bo‘ldi

O‘zbekiston Sog‘liqni saqlash vaziri Amrillo Inoyatov Jahon sog‘liqni saqlash tashkiloti (JSST) rahbari Tedros Gebreyyesusga «O‘zbekiston sog‘liqni saqlash a’lochisi» ko‘krak nishonini topshirdi. Bunga O‘zbekiston bilan JSST samarali hamkorligini ta’minlashga qo‘shayotgan hissasi va beg‘araz yordami sabab bo‘lgani aytilmoqda.

Ko‘krak nishoni Jyenevada o‘tayotgan Jahon sog‘liqni saqlash assambleyasining 76-sessiyasida topshirildi. Amrillo Inoyatov O‘zbekistonda sog‘liqni saqlash sohasini rivojlantirishda ko‘rsatilayotgan beg‘araz yordam uchun Gebreyyesusga minnatdorlik bildirgan.

Qayd qilinishicha, JSST rahbari ham yurtimiz tibbiyotida olib borilayotgan islohotlarni yuqori baholab, silga qarshi kurash borasida amalga oshirayotgan ishlari boshqa davlatlarga o‘rnak bo‘lishini ta’kidlagan.