Farg‘onada Milliy gvardiya va tez yordam mashinalari to‘qnashdi

Quvasoyda Qo‘riqlash boshqarmasi va tez yordam mashinalari o‘rtasida YTH sodir bo‘ldi. Ikki kishi jarohatlangan.

Foto: Ijtimoiy tarmoqlar

Farg‘ona viloyatidagi Quvasoy shahrida Milliy gvardiya qo‘riqlash boshqarmasi tezkor harakatlanuvchi guruh avtotransporti va tez tibbiy yordam mashinasi o‘rtasida yo‘l-transport hodisasi sodir bo‘ldi.

Mazkur holat yuzasidan olib borilgan dastlabki surishtiruvlar jarayonida, tezkor harakatlanuvchi guruh haydovchisi boshqaruvidagi avtotransport vositasi Quvasoy shahar A.Navoiy ko‘chasida harakatlanib ketayotgan vaqtida, qarama-qarshi yo‘nalishda harakatlanib kelayotgan tez tibbiy yordam bo‘limining "Damas" avtomashinasi bilan to‘qnashib, yo‘l-transport hodisasi sodir etilganligi ma’lum bo‘lgan.

YTH oqibatida 2 nafar fuqaro yengil va o‘rta darajadagi tan jarohati olishgan.

Holat yuzasidan Quvasoy shahar prokuraturasi tomonidan tergovga qadar tekshiruv ishlari amalga oshirilmoqda.

#YTH #Quvasoy