Xerson oblastida suv chekinmoqda, Baxmut atrofida janglar davom etmoqda. Urush suratlari

Ukrainadagi urushning 480-kuni o‘tdi. Asosiy ma’lumotlar:

Yevgeniy Prigojin «Vagner» XHK bilan shartnomasi yakunlangani tufayli 32 ming sobiq mahbus uyga qaytgani haqida xabar berdi. RF prezidenti Vladimir Putin 2023 yil yozida Ukrainada jang qilishga rozilik bildirgan mahbuslarni afv etish to‘g‘risidagi farmonga imzo chekkanini tasdiqlagandi.
Yevroittifoq Ukrainaga qurol yetkazib berishni tezlashtirishni va’da qildi. Ichki bozor masalalari bo‘yicha komissar Tiyerri Breton kelgusidagi qo‘llab-quvvatlov Ukraina qurolli kuchlarining jang maydonidagi muvaffaqiyatlariga bog‘liq bo‘lmasligiga ishontirdi.
Belgorod oblasti gubernatori Vyacheslav Gladkov so‘nggi bir kun davomida region hududiga turli turdagi 120 ta snaryad bilan zarbalar yo‘llanganini xabar qildi.
Petrozavodsk shahri meri «Axmat» bataloniga ko‘ngilli sifatida yo‘l olganini ma’lum qildi.
Roman Abramovich «Chelsi» sotuvidan tushgan 2,3 milliard funtni Ukrainaga berishdan bosh tortgan, deb xabar bermoqda Daily Mail tabloidi. Nashr ma’lumotlariga ko‘ra, biznesmen mablag‘ urushdan jabrlangan rossiyaliklar va ukrainaliklarga teng taqsimlanishini istamoqda.

Kunning asosiy fotosurati. Okkupatsiya ostidagi Gola Pristanda Kaxovka GESdagi vayrongarchilik oqibatlari