Ukraina YeIdan yana 50 milliard yevro oladi

20 iyun, seshanba kuni Bryusselda Kiyevga 2024-2027 yillar davomida yana 50 milliard yevro ajratilishi ko‘zda tutilgan yangi reja taqdim etildi. Jamg‘armaning tashkil etilishi haqida Yevropa komissiyasi rahbari Ursula fon der Lyayyen ma’lum qildi. «Ushbu zaxira, birinchi navbatda, Ukrainadagi hamkorlarimiz uchun ishonchni ta’minlaydi. Bu boshqa donorlarning faolligini ham rag‘batlantirishi kerak», dedi u va yangi jamg‘arma YeIga urushda talab qilinadigan moslashuvchanlik bilan harakat qilish imkonini berishini ta’kidladi.

Zaxira 17 milliard yevro grant va 33 milliard yevro kreditdan iborat bo‘ladi, ammo grantlar va kreditlarning aniq yillik ulushi har yili standart budjet protsedurasi doirasida Yevropa Parlamenti va Yevropa Ittifoqi Kengashi tomonidan belgilanadi. 

Mablag‘larning katta qismi - 39 milliard yevro grant va kreditlar Ukraina davlat budjetini qo‘llab-quvvatlashga yo‘naltirilishi rejalashtirilgan. 8 milliard yevro Ukrainaga sarmoya kiritish uchun kafolatlar va shart-sharoitlar yaratish uchun mo‘ljallangan, yana 3 milliard yevro esa mamlakatga texnik yordam ko‘rsatish uchun ajratilgan. Paketning asosiy maqsadlari Ukrainani rekonstruksiya va modernizatsiya qilish, Yevropa Ittifoqiga kirish yo‘lidagi islohotlarni qo‘llab-quvvatlash, davlat xizmatlarini uzluksiz ko‘rsatish, ijtimoiy nafaqalar, maktablar va shifoxonalar uchun davlat mablag‘lariga bo‘lgan ehtiyojni qoplash, xususiy sektorga investitsiyalarni safarbar etishdan iborat. 

Yevrokomissiya rejasi Ukraina hukumati bilan kelishilishi kerak, dedi Bryusseldagi brifingda Yevropa Ittifoqining yuqori martabali rasmiysi. «Bu Yevropa Ittifoqining tarixdagi eng yirik moliyaviy vositasi bo‘lib, uchinchi davlat uchun mo‘ljallangan», — dedi u. 

Bryussel bunday yirik investitsiyalar munosabati bilan qo‘shimcha shart qo‘yishga qaror qildi: audit va nazorat bo‘yicha kengaytirilgan qoidalar. Birinchidan, Ukraina yordam samaradorligini oshirish uchun audit va nazorat tizimini modernizatsiya qilishi kerak. Ikkinchidan, Yevrokomissiya rejani amalga oshirish jarayonida istalgan vaqtda tekshiruv o‘tkazish imkoniyatiga ega bo‘lishi kerak. Uchinchidan, qonunbuzarliklar, firibgarlik va korrupsiyaning oldini olish uchun mustaqil auditorlar kengashi tuziladi, u davlat mablag‘larini samarasiz boshqarish, shuningdek, nazorat tizimidagi kamchiliklar to‘g‘risida Yevropa komissiyasiga hisobot berishi kerak bo‘ladi.