Baltimorda yuz bergan otishmada 28 kishi yaralandi

Amerikaning Baltimor shahri politsiyasi 2 iyul, yakshanbaga o‘tar kechasi shahar mavzelaridan birida ommaviy tantanalar vaqtida sodir bo‘lgan otishmaning sabablarini o‘rganmoqda. Otishmada 18 yoshli qiz halok bo‘lgan, 20 yoshli mahalliy fuqaro esa keyinroq kasalxonada vafot etgan. Bundan tashqari, hodisa oqibatida 28 kishi jarohatlangan, ulardan uch nafarining ahvoli og‘ir, deya xabar berdi mahalliy politsiya.

Baltimor politsiyasi komissari Richard Uorlining so‘zlariga ko‘ra, jinoyat sodir bo‘lgan joy ancha keng bo‘lgan, ammo politsiya va tergovchilar qurolli shaxslarni qidirmoqda.

OAVning qayd etishicha, hodisa butun Qo‘shma Shtatlar bo‘ylab mamlakat Mustaqillik kunini nishonlash arafasida o‘tkazilgan ommaviy tantanalar fonida sodir bo‘lgan. Misol tariqasida AP agentligi 2 iyulga o‘tar kechasi Kanzas shtati klublaridan birida sodir bo‘lgan otishma natijasida to‘qqiz kishi jarohatlangan shunga o‘xshash voqeani ham keltirmoqda.

Baltimordagi otishma guvohlaridan birining ommaviy axborot vositalariga aytishicha, tantanalar paytida odamlar pirotexnika portlashlari ovozini o‘q deb adashgan va shu sababli ular haqiqiy otishmaga darhol e’tibor bermagan.

Baltimor meri Brendon Skott jinoyat joyida jurnalistlar bilan gaplashar ekan, voqeani qoralab, uni “bo‘lmasligi kerak bo‘lgan fojia” deb atadi. "Bu yana bir bor ko‘chalarimizdagi noqonuniy qurollarning eng yuqori darajasiga qarshi kurashish zarurligini va unga ega bo‘lmasligi kerak bo‘lganlar uchun uni qo‘lga olish imkoniyati mavjudligini yana bir bor ta’kidlaydi”, — dedi siyosatchi.