«Yandeks» asoschisi Voloj Ukrainadagi harbiy harakatlarga qarshi chiqdi

«Yandeks» asoschisi Arkadiy Voloj birinchi marta Rossiyaning Ukrainadagi «maxsus harbiy operatsiyasi» haqida gapirdi. Uning bayonotini Forbes nashriga tadbirkorning matbuot xizmati taqdim etgan. 

«O‘tgan yil davomida menga juda ko‘p savollar berildi va ayniqsa, ularning ko‘pi shu haftada paydo bo‘ldi. Men o‘z pozitsiyamga oydinlik kiritmoqchiman», — dedi tadbirkor. Shu hafta boshida OAV Voloj o‘z veb-saytida Rossiyani tarjimai holidan olib tashlaganini payqagandi. Endilikda u yerda aytilishicha, Voloj — «Qozog‘istonda tug‘ilgan isroillik texnologik tadbirkor». 

Voloj «do‘stlari va qarindoshlari yashayotgan» Ukrainadagi «maxsus operatsiya»ga «qat’iy qarshi» ekanligini aytdi. «Ukrainaliklarning uylariga har kuni bombalar uchib kelayotgani meni dahshatga solmoqda. 2014 yildan beri men Rossiyada yashamagan bo‘lsam ham, mamlakat harakatlari uchun mening ham mas’uliyatim borligini tushunaman», dedi tadbirkor. Avvalroq Rossiya Mudofaa vazirligi fuqarolik infratuzilmasiga hujum qilmayotganini bir necha bor ta’kidlagandi. 

«Yandeks» yaratuvchilari, Volojning so‘zlariga ko‘ra, «yangi Rossiya - ochiq, ilg‘or, jahon iqtisodiyotiga integratsiyalashgan davlat» qurilyapti deb ishongan. Biroq, vaqt o‘tishi bilan Rossiya «global dunyoning bir qismi bo‘lishga shoshilmayotgani» ma’lum bo‘ldi va «Yandeks»ga rasmiylar tomonidan bosim kuchaygan. 

2014 yilda Voloj Isroilga ko‘chib o‘tdi va u yerda kompaniyaning xalqaro loyihalarini ishlab chiqishda ishtirok etdi, biroq 2022 yil fevralida «dunyo o‘zgardi va men «Yandeks» bilan bo‘lgan hikoyam tugaganini angladim», deya o‘z fikri bilan o‘rtoqlashgan tadbirkor. Shundan so‘ng u «mamlakatni tark etib, yangi hayot boshlashga qaror qilgan iqtidorli rossiyalik muhandislarni qo‘llab-quvvatlashga e’tibor qaratdi», deyiladi bayonotda. 

Voloj Rossiyaning Ukrainadagi harakatlari haqida gapirmaganiga «ko‘p sabablar» borligini ta’kidlab o‘tdi, ammo ular qanday ekanini ochiqlamadi. «Siz mening bayonotimning dolzarbligi haqida bahslashishingiz mumkin, lekin uning mohiyati haqida emas», - deya xulosa qildi tadbirkor. 

Arkadiy Voloj 2000 yilda Ilya Segalovich bilan birgalikda «Yandeks» kompaniyasiga asos solgan. Segalovich 2013 yilda vafot etgan. 2022 yilda Voloj Yevropa Ittifoqining sanksiyalari ostida qoldi, shundan so‘ng «Yandeks»dagi barcha postlarini tark etdi. 2022 yil mart oyida Voloj dollardagi milliarder maqomini yo‘qotdi. 

2022 yil noyabr oyida «Yandeks» biznesni boshqarish tuzilmasini o‘zgartirish va aktivlarni bo‘lish haqidagi taxminiy niyatini e’lon qildi. Rossiya biznesi alohida kompaniyalar guruhiga bo‘linadi, ulardan Niderlandiyaning Yandex N.V. ajralib chiqib, o‘z nomini o‘zgartiradi. O‘tgan yilning oxirida Voloj «Yandeks» xodimlari bilan xayrlashib, «Yandeks holdingidan tashqarida rivojlanishi mumkin bo‘lgan to‘rtta xalqaro startapga maslahat berishdan manfaatdor ekanligini» ta’kidladi.

«Yandeks» matbuot xizmati Forbes’ga ma’lum qilishicha, restrukturizatsiya jarayoni hali yakunlanmagan. Shirkat kompaniyani tark etgan Volojning shaxsiy bayonotiga izoh berishning iloji yo‘q deb hisoblashini qo‘shimcha qildi.