Volojning Nebius kompaniyasi Meta bilan 27 mlrd dollarlik bitim tuzdi

Sobiq «Yandeks» bosh direktori Arkadiy Voloj tomonidan asos solingan va sun’iy intellekt uchun bulutli yechimlarga ixtisoslashgan Niderlandiyaning Nebius Group N.V. kompaniyasi Amerikaning Meta Platforms Inc. shirkati bilan SI loyihalari uchun infratuzilma yetkazib berish bo‘yicha uzoq muddatli kelishuv tuzdi. Bu haqda Nebius'ning 16 mart, dushanba kuni e’lon qilingan press-relizida xabar berildi.

Besh yilga mo‘ljallangan kelishuv doirasida Nebius qiymati 12 milliard dollar bo‘lgan ajratilgan hisoblash quvvatlarini taqdim etadi, ular NVIDIA Vera Rubin platformasi asosida ishlaydi. Ilk yetkazib berishlar 2027 yil boshiga rejalashtirilgan.

Bundan tashqari, Meta besh yillik davr mobaynida Nebius'ning yangi klasterlardagi kelajakdagi hisoblash quvvatlarining bir qismini umumiy qiymati 15 milliard dollargacha bo‘lgan miqdorda xarid qilish majburiyatini olgan. Shu bilan birga, Nebius o‘z quvvatlarining bir qismini uchinchi tomon mijozlariga sotishni, qolgan qismini esa Mark Tsukerberg kompaniyasi uchun zaxirada saqlashni rejalashtirmoqda.

Bitimning umumiy qiymati taxminan 27 milliard dollarga teng. Bloomberg agentligi ta’kidlashicha, bu Meta'ning hisoblash quvvatlari bo‘yicha eng yirik shartnomalaridan biri hisoblanadi.

«Biz quvvatlar taqdim etish bo‘yicha yangi yirik uzoq muddatli shartnomalarni ta’minlash doirasida Meta bilan muhim hamkorligimizni kengaytirganimizdan mamnunmiz», — dedi Voloj.

Bu yangilik fonida Nebius aksiyalari dushanba kuni savdolar oldidan 15 foizga qimmatladi. Kompaniya aksiyalarining qiymati so‘nggi 12 oy ichida qariyb to‘rt barobar oshgan. Meta aksiyalari esa 2,8 foizga ko‘tarildi.

2025 yil kuzida Nebius Group Microsoft korporatsiyasi bilan qariyb 20 milliard dollarlik besh yillik shartnoma imzolagan, 2026 yil mart oyida esa Nvidia bilan 2 milliard dollarlik kelishuv tuzgan edi.