«Yandeks» asoschisi Voloj YeIdan o‘ziga nisbatan sanksiyalarni bekor qilishni so‘radi

«Yandeks» asoschisi, milliarder Arkadiy Voloj Yevropa Ittifoqidan Rossiyaning Ukrainaga bostirib kirishi tufayli o‘ziga nisbatan joriy etilgan sanksiyalarni bekor qilishni so‘radi, deb yozadi Financial Times 27 avgust, yakshanba kuni vaziyat bilan tanish bo‘lgan ismi oshkor etilmagan suhbatdoshlariga tayanib. 

Jurnalistlarning eslatishicha, Voloj advokatlari YeIga yuborgan rasmiy so‘rov tadbirkor 10 avgust kuni Rossiya tomonidan qo‘shni davlatga qarshi boshlangan urushni qoralaganidan bir necha kun o‘tib yuborilgan. Ularning fikricha, Bryusselning munosabati endi YeI «Kreml bilan aloqalarini buzgan rossiyaliklarni rag‘batlantirishi yoki bunday qilmasligini» ko‘rsatadi. Bu masala sentabr oyida YeIda muhokama qilinishi kutilmoqda. 

Volojning Ukrainadagi urush bo‘yicha bayonoti 

Arkadiy Voloj 10 avgust kuni 2022 yil 22 fevraldan beri birinchi marta Ukrainadagi urush bo‘yicha o‘z pozitsiyasini bildirdi. «Men Rossiyaning Ukrainaga bostirib kirishiga qat’iyan qarshiman, u yerda mening ham do‘stlarim va qarindoshlarim bor. Ukrainaliklarning uylariga har kuni bombalar uchib kelayotgani meni dahshatga solmoqda. 2014 yildan beri men Rossiyada yashamagan bo‘lsam ham, mamlakat harakatlari uchun mening ham mas’uliyatim borligini tushunaman», deyiladi tadbirkorning The Bell nashriga taqdim etilgan bayonotida. 

Voloj Rossiyaning Ukrainadagi harakatlari haqida gapirmaganiga «ko‘p sabablar» borligini ta’kidlab o‘tdi, ammo ular qanday ekanini ochiqlamadi. «Siz mening bayonotimning dolzarbligi haqida bahslashishingiz mumkin, lekin uning mohiyati haqida emas», - dedi tadbirkor. 

Arkadiy Voloj 2000 yilda Ilya Segalovich bilan birgalikda «Yandeks» kompaniyasiga asos solgan. Segalovich 2013 yilda vafot etgan. 2022 yilda Voloj Yevropa Ittifoqining sanksiyalari ostida qoldi, shundan so‘ng «Yandeks»dagi barcha postlarini tark etdi. 2022 yil mart oyida Voloj dollardagi milliarder maqomini yo‘qotdi. 

2022 yil noyabr oyida «Yandeks» biznesni boshqarish tuzilmasini o‘zgartirish va aktivlarni bo‘lish haqidagi taxminiy niyatini e’lon qildi. Rossiya biznesi alohida kompaniyalar guruhiga bo‘linadi, ulardan Niderlandiyaning Yandex N.V. ajralib chiqib, o‘z nomini o‘zgartiradi. O‘tgan yilning oxirida Voloj «Yandeks» xodimlari bilan xayrlashib, «Yandeks holdingidan tashqarida rivojlanishi mumkin bo‘lgan to‘rtta xalqaro startapga maslahat berishdan manfaatdor ekanligini» ta’kidladi.