“O‘zbekistonda Rossiya kapitali ishtirokida korxonalar soni 3 mingga yaqinlashdi” – Botirjon Asadov

So‘nggi uch yilda O‘zbekistonda Rossiya kapitali ishtirokida korxonalar soni 2 barobar oshib, ularning soni 3 mingga yaqinlashgan. Shuningdek, yaqin kelajakda ikki mamlakat savdo aylanmasi 10 milliard dollarga yetkazilishi mumkin. Bu haqda O‘zbekistonning Rossiyadagi elchisi Botirjon Asadov ma’lum qildi.

Foto: Sputnik

“Rossiya O‘zbekistonning eng yirik savdo hamkorlaridan biri hisoblanadi. 2022 yil yakunlariga ko‘ra, ikki davlat o‘rtasida tovar aylanmasi 9 milliard dollardan oshdi va o‘sishda davom etmoqda.

Rossiya bunda tashqari iqtisodimiz uchun eng katta investorlar qatorida turadi. Xususan, oxirgi 3 yilda Rossiya kapitali ishtirokidagi korxonalar soni 2 barobar oshdi. Bugun ularning soni 3 mingga yaqinlashdi. Tog‘-kon sanoati, kimyo, energetika, qishloq xo‘jaligi kabi sohalarda sanoat kooperatsiyasi loyihalari faol amalga oshirilmoqda”, — deya elchining so‘zlarini keltirmoqda mahalliy nashr.

Rossiya sanksiyalarni chetlab o‘tish uchun O‘zbekistondan foydalanishi mumkin – AQSh

Botirjon Asadovning aytishicha, yaqin kelajakda Rossiya bilan savdo aylanmasini 10 milliard dollarga yetkazish imkoniyatlari mavjud.

Diplomatik vakolatxona rahbariga ko‘ra, Rossiyadan O‘zbekistonga kelayotgan sayyohlar soni ham oshib bormoqda. Xususan, 2022 yilning birinchi yarmida 185,6 ming kishi kelgan bo‘lsa, joriy yilda 345 ming rossiyalik sayyoh O‘zbekistonga kelgan.