Abat Fayzullayev O‘zbekistonning Italiyadagi elchisi etib tayinlandi

O‘zbekistonning Italiyaga yangi tayinlangan favqulodda va muxtor elchisi Abat Fayzullayev Rimga yetib bordi, deb xabar bermoqda «Dunyo».

Abat Fayzullayev 2020-2023 yillarda O‘zbekistonning Avstriyadagi elchisi bo‘lib ishlagan, shuningdek, Vengriyadagi diplomatik missiyani o‘rindoshlik asosida boshqargan. Bir vaqtning o‘zida, O‘zbekistonning Yevropada xavfsizlik va hamkorlik tashkiloti hamda Venadagi boshqa xalqaro tashkilotlar huzuridagi doimiy vakili bo‘lib ishlagan.

Diplomat 40 yoshda. U O‘zbekiston Tashqi ishlar vazirligi qoshidagi Jahon iqtisodiyoti va diplomatiya universiteti hamda Toshkent davlat iqtisodiyot universitetini tamomlagan.

Tashqi ishlar vazirligi va O‘zbekistonning AQShdagi elchixonasida turli lavozimlarda ishlagan, tashqi ishlar vaziri yordamchisi – kotibiyat mudiri lavozimlarida faoliyat yuritgan.

Abat Fayzullayev 2018-2023 yillarda Rimdagi diplomatik vakolatxonaga rahbarlik qilgan Otabek Akbarov o‘rniga tayinlandi.