Noyabr oyi boshlarida Ukraina qurolli kuchlari 128-alohida tog‘-shturm brigadasi jangchilari Zaporijjya oblastidagi taqdirlash marosimi vaqtida rossiyaliklar zarbasiga uchradi. 19 kishi halok bo‘lib, o‘nlab kishilar yaralangan. The Washington Post jurnalistlari omon qolganlar bilan gaplashdi. Harbiylar marosim tashkil etilishini sovetlarning Ikkinchi jahon urushi to‘g‘risidagi targ‘ibot filmlari kadrlari bilan solishtirgan va taqdirlashni nima uchun rossiyaliklarning raketalari yetib kela oladigan hududda — ochiq osmon ostida o‘tkazishga qaror qilishganidan ajablanishgan.
3 noyabr tongida UQK 128-alohida tog‘-shturm brigadasi jangchilari Zaporijjya oblasti Zarechne posyolkasida Artilleriya kuni sharafiga medallar topshirish marosimiga yig‘iladi — bu front chizig‘idan taxminan 30 kilometr ichkarida ro‘y bergan. The Washington Post nashri qayd etishicha, Ukraina hukumati harbiy xizmatchilarning jangovar ruhini ko‘tarish uchun foydalanadigan bunday marosimlar sovetlar davrining harbiy an’analarini davom ettirish hisoblanadi.
«Sovet davri qaytdi, — degan 128-brigadaning jurnalistlar bilan anonim shartida gaplashgan harbiy xizmatchilaridan biri. — Bu Rossiyaning Ikkinchi jahon urushi to‘g‘risidagi propaganda filmlarini eslatadi».
Rossiya armiyasi soat ertalab 10 atrofida — taqdirlash marosimi boshlanganidan 10 daqiqa o‘tib zarba yo‘llagan. Bu yerda bir yoki ikki raketa portlagan. Ukraina QK ma’lumotiga ko‘ra, bu «Iskander-M» raketasi bo‘lgan. Kamida 19 nafar harbiy xizmatchi, jumladan bir necha ofitserlar ham halok bo‘lgan. Yana o‘nlab harbiylar jarohat olgan.
Hodisa haqidagi xabar ukrain nashrlarida 4 noyabr kuni kechqurun paydo bo‘la boshladi. The Washington Post suhbatdoshlaridan birining tasdiqlashicha, agar harbiylarning qarindoshlari ijtimoiy tarmoqlarda «shovqin ko‘tarmaganida», bu voqea haqida «hech kim bilmay qolgan ham bo‘lardi».
Ko‘p o‘tmay Ukraina mudofaa vaziri Rustem Umerov halok bo‘lgan jangchilarning oila a’zolariga hamdardlik bildirdi va «fojia»ning barcha tafsilotlarini sinchkovlik bilan tekshirishga topshiriq berdi, ammo aynan nima ro‘y berganiga to‘xtalmadi. Keyingi kuni 128-brigadaning asosiy bazasi joylashgan Karpatorti oblasti rahbari Viktor Mikita qurbonlar xotirasiga uch kun motam e’lon qildi. Keyin brigadaning o‘zi ham Zaporijjya oblastida rossiyaliklar raketa zarbasi oqibatida harbiylari halok bo‘lganini tasdiqladi.
Qancha harbiy halok bo‘lib, qanchasi yaralangani aniq emas. Brigadaning o‘zida 19 nafar harbiy xizmatchining o‘limi tasdiqlangan. Ukraina Oliy radasi deputati Oleksiy Kucherenko 28 qurbon va 53 yarador haqida xabar bergandi. The Washington Post bilan suhbatda brigada harbiy xizmatchilaridan biri 21 nafar quroldoshi o‘limi haqida aytgan. «Zarba vaqtida qancha odam yaralangani yoki halok bo‘lganini aniq aytish qiyin. Otishmadan keyin 21 jasad sanalgandi. Hospitaldagilarning barchasi yashab ketgani noma’lum», — degan u.
