Samarqandda tibbiyot birlashmalari rahbarlarining qonundan tashqaridagi 22 ta buyrug‘i bekor qilindi

Monitoring davomida 11 ta tuman tibbiyot birlashmalarida 22 ta holatda mavjud vakant lavozimlarga ochiq tanlovlarsiz hamda tanlov g‘olibi aniqlangunga qadar "vaqtincha bajaruvchi" sifatida xodimlarni ishga olish holatlari aniqlangan.

Monitoring natijasi bo‘yicha Bulung‘ur, Jomboy, Narpay, Nurobod, Payariq, Paxtachi, Toyloq, Samarqand tumanlari va Samarqand shahar tibbiyot birlashmalarining 9 nafar rahbar xodimlari jami 23 million 100 ming so‘m miqdorida ma’muriy jarimaga tortilgan.

Shuningdek, noqonuniy ishga qabul qilinganlar bo‘yicha 22 ta buyruq bekor qilinib, tashkilotlarning Inson resurslarini rivojlantirish va boshqarish bo‘limlari boshliqlariga intizomiy chora qo‘llash uchun viloyat Sog‘liqni saqlash boshqarmasiga taqdimnoma kiritilgan.