O‘zbekistonning yangi tayinlangan elchisi Italiya prezidenti bilan uchrashdi

«Dunyo» xabariga ko‘ra, tantanali marosim Italiya prezidentining Rim shahridagi rasmiy qarorgohi – «Kvirinale» saroyida bo‘lib o‘tdi.

Bo‘lib o‘tgan suhbat davomida Serjio Mattarella joriy yilning 9-11 noyabr kunlari O‘zbekistonga amalga oshirgan rasmiy tashrifini yodga oldi va tashrif unda unutilmas taassurotlar qoldirganini qayd etdi.

Uchrashuvda ikki mamlakat o‘rtasida strategik muloqotni ilgari surishning yuksak ahamiyati tasdiqlandi, O‘zbekiston va Italiyaning siyosiy, savdo-iqtisodiy va madaniy-gumanitar hamkorligi istiqbollaridan samarali foydalanishdan ikki tomon ham manfaatdorligi ta’kidlandi.

Suhbat yakunida Italiya prezidenti O‘zbekistonning boy tarixiy va madaniy merosi hamda u ziyorat qilgan Samarqand va Xiva shaharlaridagi qadimiy obidalar jozibasini alohida qayd etdi.

Abat Fayzullayev joriy yilning oktyabr oyida O‘zbekistonning Italiyadagi elchisi etib tayinlandi. U 2020-2023 yillarda O‘zbekistonning Avstriyadagi elchisi bo‘lib ishlagan, shuningdek, Vengriyada o‘rindoshlik asosida elchi bo‘lgan. Bir vaqtning o‘zida, O‘zbekistonning Yevropada xavfsizlik va hamkorlik tashkiloti hamda Venadagi boshqa xalqaro tashkilotlar huzuridagi doimiy vakili lavozimida faoliyat olib borgan.

Abat Fayzullayev 2018-2023 yillarda Rimdagi diplomatik vakolatxonaga rahbarlik qilgan Otabek Akbarov o‘rniga tayinlandi.