Kiyevga tashrif: Ostin Ukrainaga AQSh qo‘llab-quvvatlovi davom etishini va’da qildi

AQSh «Kongressdagi respublikachilarning qarshiliklari kuchayishi va jang maydonidagi muvaffaqiyatsizliklarga qaramay» Ukrainani Rossiyaga qarshi mudofaa harakatlarida qo‘llab-quvvatlashda davom etadi. Kiyevga e’lon qilinmagan tashrif bilan kelgan AQSh mudofaa vaziri Lloyd Ostin Ukraina rahbariyatini bunga ishontirdi. Pentagon rahbarining so‘zlarini 20 noyabr, dushanba kuni Amerikaning The Washington Post gazetasi Ostin boshchiligidagi delegatsiyaning nomi oshkor etilmagan a’zolariga tayangan holda keltirdi.

Amerikalik vazirning o‘zi Ukraina prezidenti Volodimir Zelenskiy bilan uchrashuvdan so‘ng X ijtimoiy tarmog‘ida shunday yozdi: «Biz ittifoqchilarimiz va hamkorlarimiz bilan birgalikda Ukrainani bevosita jang maydoni va uzoq muddatli mudofaa ehtiyojlarini qondirishda qo‘llab-quvvatlashda davom etamiz». Uning ta’kidlashicha, Qo‘shma Shtatlar Ukrainani kuchli qo‘llab-quvvatlashini tasdiqlash uchun o‘zining Ukraina prezidenti bilan uchrashuvi «sharafdir».

Ostin «Ramshtayn» formatidagi 17-uchrashuvga mezbonlik qiladi

Lloyd Ostin bilan birgalikda NATOning Yevropadagi ittifoqchi kuchlari oliy qo‘mondoni, general Kristofer Kavoli Kiyevga yetib keldi. Pentagon saytida ta’kidlanishicha, ushbu tashrif davomida AQSh Mudofaa vazirligi rahbari Ukraina rahbariyati bilan strategik sheriklikni yanada mustahkamlash, jumladan, «Ukraina qurolli kuchlarini zarur bo‘lgan jangovar imkoniyatlar bilan ta’minlash masalalarini muhokama qilmoqchi».

Shu hafta oxirida amerikalik vazir Ukraina mudofaasi bo‘yicha aloqa guruhining «Ramshtayn» formatidagi 17-yig‘ilishni o‘tkazadi, u onlayn tarzda bo‘lib o‘tadi. Uchrashuvda 50 ga yaqin davlat vakillari ishtirok etishi kutilmoqda.

AQSh parlamentining Ukrainaga yordami so‘roq ostida qolmoqda

Qo‘shma Shtatlar Ukrainaning asosiy ittifoqchisi va harbiy yordam hajmi bo‘yicha yetakchi hisoblanadi. Ukraina urushi boshlanganidan beri Vashington Ukraina tomonini qo‘llab-quvvatlash uchun 60 milliard dollar ajratdi. Amerika rasmiylariga ko‘ra, joriy yilning noyabr oyi boshiga kelib Qo‘shma Shtatlar ushbu mablag‘ning 96 foizini sarflab bo‘lgan.

Prezident Jo Bayden oktyabr oyida AQSh parlamentidan Ukrainaga 61,4 milliard dollar, Isroilga esa 14,3 milliard dollar yordam ko‘rsatishni ma’qullashni so‘ragan, biroq demokratlar va respublikachilar o‘rtasidagi kelishmovchiliklar tufayli yillik budjet hali qabul qilinmadi. Kongressning har ikki palatasi faqat vaqtinchalik budjetni ma’qulladi, unda Ukraina va Isroilga yordam nazarda tutilmagan.