Uchtepa va Shayxontohurdagi elektr uzilishlariga nima sabab bo‘ldi?

9 dekabrdan boshlab O‘zbekistonda sovuq havo massalari kirib kelishi boshlandi. 12 dekabrga kelib ayrim hududlarda havo harorati -20 darajaga pasaydi. Aholi qorga burkangan tabiat ne’matidan bahra olish bilan birga sovuqning qattiq zahrini ham totib ko‘rishdi. Bunga elektr uzilishlari, gaz bosimining pasayishi sabab bo‘ldi. 12 dekabrdan 13 dekabrga o‘tar kechasi Toshkent shahrining Uchtepa, Shayxontohur, Sergeli, Yakkasaroy tumanlarida chiroq o‘chganligi sababli fuqarolar tuman elektr ta’minoti bo‘limlarida to‘planishgan.

Kun.uz Hududiy elektr tarmoqlari korxonasi matbuot xizmati rahari Faxriddin Nuraliyev bilan jonli bog‘lanib, vaziyat bo‘yicha izoh oldi. U vaziyatdan xabardorligini va bu holat "Hududiy elektr tarmoqlari" AJ tomonidan shunday noqulay ob-havo sharoitlarida hisoblagichlar orqali cheklovlar kiritish amaliyoti joriy etilishi bilan bog‘liq ekanini aytdi.

“Bu Vazirlar Mahkamasining 22-sonli qaroriga asosan joriy etildi. Elektr energiya iste’moli avtomatlashtirilgan tizim orqali qarordagi me’yordan oshib ketsa (10-15 kilovatt), uzib qo‘yiladi.

Bu kiritilgan funksiya orqali mamlakatimiz elektr tarmoqlaridagi transformatorlar, kabellarda yuzaga kelishi mumkin bo‘lgan avariya holatlarining oldi olindi. Bu bilan uzoq vaqtli uzilishlar oldi ham olindi. Qolaversa, iste’molchilarga teng taqsimlash imkoni paydo bo‘ldi.

Bunday holat faqat hovlilarda yashovchi aholida bo‘ldi. Chunki bunday xonadonlarda elektr nisbatan ko‘proq ishlatiladi. Ayni paytda bu amaliyot to‘xtatildi. Chunki ko‘plab iste’molchilar energiya ta’minotidan uzilib qoldi.

Bu amaliyotda iste’molchi belgilangan miqdordan ko‘p ishlatsa, avtomatik tarzda uziladi va ko‘p elektr sarflayotgan jihozlarni elektrdan ajratish bilan yana qayta ulanadi. Iltimos qilardimki, iste’molchilarimiz elektrdan to‘g‘ri foydalanishsin”, - deya iste’molchilarga murojaat qildi Nuraliyev.