Sud Dunsovaning Rossiya MSKga qarshi da’vosini rad etdi

27 dekabr, chorshanba kuni Rossiya Federatsiyasi Oliy sudi rjyevlik jurnalist Yekaterina Dunsovaning prezident saylovida qatnashish maqsadida o‘z nomzodini qo‘llab-quvvatlash uchun imzo to‘plash bo‘yicha tashabbuskor guruhni ro‘yxatga olishdan bosh tortgan Rossiya Markaziy saylov komissiyasiga nisbatan da’vosini rad etdi. Avvalroq, 25 dekabr kuni u MSK qaroriga norozilik bildirgan edi.

23 dekabr kuni Markaziy saylov komissiyasi Dunsovaga imzo to‘plashga ruxsat bermadi va buni hujjatlarda aniqlangan xatolar bilan izohladi. Shu bilan birga, MSK o‘z dalillarini «faqat hisobot ma’lumoti bilan tasdiqlaydi - bunday hujjatdan foydalanish prinsipial jihatdan qonunda ko‘zda tutilmagan, shuning uchun uni qaror qabul qilish uchun asos qilib bo‘lmaydi», deb ta’kidladi Dunsova. 

«MSK tomonidan saylovchilar ma’lumotlaridagi xatolar haqida og‘zaki bayonotlar ham deyarli isbotlanmagan. Qolaversa, ular rad etish to‘g‘risidagi qarorda keltirilgan, biroq aniq ko‘rsatilmagan va qaror qabul qilish uchun asos bo‘lmagan», - deya qo‘shimcha qildi jurnalist. Uning so‘zlariga ko‘ra, saylovchilar guruhi a’zolarining ma’lumotlarini tekshirish notariusning zimmasida, MSK esa bunday tartibni amalga oshirish huquqiga ega emas.

Dunsova partiya tashkil etishini e’lon qildi 

Markaziy saylov komissiyasining ro‘yxatga olishdan bosh tortishiga javoban Dunsova o‘z partiyasini tashkil etishini e’lon qildi. «Biz o‘n millionlab fuqarolarmiz, lekin birorta ham siyosiy partiya bizdan vakillik qilmayapti yoki vakil bo‘lishni xohlamayapti. O‘zimiz partiya tuzib, o‘zgarishlarga erishishdan boshqa ilojimiz yo‘q. Bu bizning vatanimiz va boshqasi hech qachon bo‘lmaydi», - deb yozdi u. 

Dunsovaning so‘zlariga ko‘ra, partiya «tinchlik, erkinlik va demokratiya tarafdori bo‘lgan har bir kishi» vakili bo‘ladi. Jurnalistning aytishicha, yaqin vaqt ichida partiya tashkiliy qo‘mitasi tashkil etish, mintaqalarda tarafdorlar yig‘ilishi va kelasi yil boshida ta’sis qurultoyiga delegatlar saylovi o‘tkazish niyatida. «Mart oyida biz partiyaning ta’sis qurultoyini o‘tkazamiz, may oyiga qadar Rossiya mintaqalarining yarmidan ko‘pida mintaqaviy bo‘limlarni ro‘yxatdan o‘tkazamiz, iyun oyida sentabrda bo‘lib o‘tadigan barcha saylovlarga nomzodlarni ko‘rsatamiz», dedi Dunsova. 

Demokratik islohotlar va siyosiy mahbuslarni ozod qilish tarafdori

Krasnoyarsklik Yekaterina Dunsova - jurnalist va ko‘ngilli qidiruv-qutqaruv guruhining koordinatori, Rjyev shahar dumasi deputati bo‘lib ishlagan. U 16 noyabr kuni prezidentlikka nomzodini qo‘yish niyatini ma’lum qildi va bu qarorini «so‘nggi o‘n yil davomida mamlakat noto‘g‘ri yo‘nalishda: taraqqiyot yo‘lida emas, balki o‘z-o‘zini yo‘q qilish yo‘lida ketayotgani» bilan izohladi. Dunsova urushni to‘xtatish, demokratik islohotlar va siyosiy mahbuslarni ozod etish tarafdori.  

Uch kunlik prezidentlik saylovlari

Rossiyada prezidentlik saylovlari 2024 yil 15-17 mart kunlari bo‘lib o‘tadi. Hozirgi davlat rahbari Vladimir Putin ham nomzod sifatida qatnashmoqda. Rossiya Liberal-demokratik partiyasidan uning rahbari Leonid Slutskiy, RFKPdan - Nikolay Xaritonov, «Fuqarolik tashabbusi»dan - Moskva viloyatidan deputat Boris Nadejdin, «Novyye lyudi»dan - Davlat dumasi vitse-spikeri Vladislav Davankov oliy lavozimga nomzod sifatida ko‘rsatilgan.

«Rossiyskiy obshchenarodnyy soyuz» konservativ partiyasi bo‘lajak saylovlarga o‘z raisi Sergey Baburin nomzodini ko‘rsatishga qaror qildi. Bundan tashqari, Moskvada Donetskdagi rossiyaparast ayirmachilarning sobiq harbiy rahbari Igor Strelkov (Girkin) nomzodini ko‘rsatish bo‘yicha yig‘ilish bo‘lib o‘tdi. Tashabbus guruhi yig‘ilish ishtirokchilaridan 566 nafar imzo to‘pladi, biroq notariuslar buni tasdiqlash uchun kelmadi.