Ukraina Si Jinpingni Shveytsariyadagi tinchlik sammitiga taklif qildi

XXRning Shveytsariyada o‘tkazilishi rejalashtirilgan forumdagi ishtiroki Kiyev uchun juda muhim bo‘ladi, dedi Reuters agentligiga Ukraina prezidenti devonxonasi rahbari o‘rinbosari Igor Jovkva.

Kiyev Xitoy rahbari Si Jinpingni global tinchlik sammiti - Ukrainadagi vaziyatni tinch yo‘l bilan tartibga solish bo‘yicha 5-konferensiya deb atalmish anjumanda ishtirok etishga taklif qildi. Bu haqda 26 yanvar, juma kuni Ukraina prezidenti devoni rahbari o‘rinbosari Igor Jovkva Reuters agentligiga bergan intervyusida aytib o‘tdi. Pekinning Shveytsariyada o‘tkazilishi rejalashtirilgan ushbu forumdagi ishtiroki Kiyev uchun juda muhim bo‘ladi, dedi Jovkva. Uning so‘zlariga ko‘ra, Ukraina Xitoy tomoni bilan ishlamoqda, shuningdek, bo‘lajak konferensiyaning ahamiyatini XXRga yetkazish uchun xalqaro hamkorlarni jalb qilmoqda. 

Xitoy hozircha Ukrainadagi Rossiya qo‘shinlarining harakatlarini tanqid qilishdan o‘zini tiyib kelmoqda. 2023 yil 24 fevralda e’lon qilingan «tinchlik rejasi»da Pekin sodir bo‘layotgan voqealarni urush deb atamadi va Rossiya Federatsiyasini Ukraina hududidan qo‘shinlarini olib chiqishga chaqirmadi, faqat barcha mamlakatlar suverenitetini hurmat qilish, tinchlik muzokaralarini davom ettirish va harbiy harakatlarni to‘xtatish zarurligini ta’kidladi. 

Ukraina bo‘yicha beshinchi tinchlik konferensiyasi 

Ukraina bo‘yicha beshinchi tinchlik sammiti Shveytsariyada tashkil etilishini ikki davlat prezidentlari Volodimir Zelenskiy va Viola Amherd yanvar o‘rtalarida e’lon qilgan edi. Forum 2023 yilda Daniya, Saudiya Arabistoni va Maltada hamda 2024 yil 14 yanvarda Davosda bo‘lib o‘tgan Ukrainadagi vaziyatni tinch yo‘l bilan tartibga solish bo‘yicha to‘rtta konferensiyaga o‘xshash formatda o‘tkaziladi. Ukraina va Shveytsariya uchrashuvga hozirdanoq tayyorgarlikni boshlab yuborgan, biroq tadbir sanasi va uning ishtirokchilari ro‘yxati kabi qator tafsilotlar hozircha kelishib olinmagan. 

Kiyev Rossiyani uchrashuvga taklif qilish niyatida emasligini ochiq bildirdi. Shu bilan birga, Shveytsariya prezidenti Rossiyaning Ukraina bo‘yicha tinchlik sammitida ishtirok etishini kutmayapti, lekin Moskvasiz davlat vakillarining uchrashuvi «haqiqiy tinchlik muzokaralariga aylanishi dargumon» ekanligini tan oldi. Bern Moskva bilan aloqalarni to‘xtatmaydi, dedi Amherd.