17 mln so‘mgacha jarima – pirotexnika buyumlarining noqonuniy savdosi uchun javobgarlik kuchaytiriladi

Ma’muriy javobgarlik to‘g‘risidagi kodeksga pirotexnika buyumlarining noqonuniy savdosi bilan bog‘liq huquqbuzarliklarga javobgarlikni kuchaytirishga doir o‘zgartirishlar kiritilmoqda. Bu haqdagi qonun muhokamaga qo‘yildi.

Qayd etilishicha, fuqarolarning hayoti, sog‘ligi va jamoat tartibini saqlashga, yong‘in va boshqa favqulodda vaziyatlarning kelib chiqishiga turli darajadagi tahdidlarni yuzaga keltirishi mumkin bo‘lgan xatti-harakatlar uchun bir xil javobgarlik choralari belgilanganligi ularning to‘liq profilaktik ta’sirini ta’minlashga to‘sqinlik qilmoqda. Qolaversa, pirotexnika buyumlarining qonunga xilof muomalasiga oid ma’muriy huquqbuzarliklar bo‘yicha bayonnoma tuzish vakolatlari faqat Milliy gvardiya organlarining mansabdor shaxslariga berilganligi g‘ayriqonuniy qilmishlarga qarshi kurash faoliyatining samaradorligiga salbiy ta’sir ko‘rsatyapti.

Qonun loyihasiga ko‘ra, pirotexnika buyumlarining qonunga xilof muomalasini tashkil etuvchi huquqbuzarliklar turlarining xavflilik darajasidan kelib chiqqan holda javobgarlik choralari kuchaytiriladi. Shuningdek, Milliy gvardiya organlari bilan birga ichki ishlar organlariga ham ma’muriy bayonnomalarni rasmiylashtirish vakolati beriladi.

Ma’muriy javobgarlik to‘g‘risidagi kodeksning  1851-moddasiga kiritilayotgan o‘zgartirishga ko‘ra, pirotexnika buyumlaridan qonunga xilof ravishda foydalanish huquqbuzarlik ashyolarini musodara qilib, BHMning 5 baravaridan 20 baravarigacha miqdorda jarima solishga sabab bo‘ladi. Pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, O‘zbekiston Respublikasi hududidan olib chiqish uchun esa huquqbuzarlik ashyolarini musodara qilib, BHMning 15 baravaridan 30 baravarigacha miqdorda jarima jazosi belgilanmoqda.

Pirotexnika buyumlarini qonunga xilof ravishda o‘tkazish, O‘zbekiston hududiga olib kirish huquqbuzarlik ashyolarini musodara qilib, bazaviy hisoblash miqdorining 25 baravaridan 50 baravarigacha miqdorda jarima solishga sabab bo‘ladi.