Регламент лойиҳасига кўра, табиий муҳитга, инсон саломатлигига ёки табиий ресурсларга сезиларли зарар етказмаган, оқибатлари қисқа муддатда бартараф этилиши мумкин бўлган ҳамда одатда биринчи марта ёки тизимли бўлмаган ҳолда содир этилган қонунбузилишлар иқтисодий жиҳатдан паст таъсир даражасига эга ҳуқуқбузарлик сифатида баҳоланиши мумкин.
Лойиҳада бундай ҳуқуқбузарликлар қаторига ҳисоботларни қисқа муддатга кечиктириш, чиқиндиларни ҳисобга олишдаги техник хатолар, кўкаламзорлаштириш ишларини ўз вақтида бажармаслик, экологик ҳисоб-китоблардаги номутаносибликлар ва атроф-муҳитга зарар етказмаган бошқа қатор ҳолатлар киритилган.
Ҳуқуқбузарликнинг паст таъсир даражасига эга эканини аниқлашда зарарнинг мавжудлиги ва миқдори, оқибатларнинг давомийлиги, камчиликни тез бартараф этиш имконияти, экологик ҳамда ижтимоий хавфсизликка таъсири каби мезонлар ҳисобга олинади. Шунингдек, Экологик назорат инспекцияси ҳар бир ҳолатни алоҳида ўрганиб, қонунбузилишни бартараф этиш бўйича тавсиялар беради.
