Reglament loyihasiga ko‘ra, tabiiy muhitga, inson salomatligiga yoki tabiiy resurslarga sezilarli zarar yetkazmagan, oqibatlari qisqa muddatda bartaraf etilishi mumkin bo‘lgan hamda odatda birinchi marta yoki tizimli bo‘lmagan holda sodir etilgan qonunbuzilishlar iqtisodiy jihatdan past ta’sir darajasiga ega huquqbuzarlik sifatida baholanishi mumkin.
Loyihada bunday huquqbuzarliklar qatoriga hisobotlarni qisqa muddatga kechiktirish, chiqindilarni hisobga olishdagi texnik xatolar, ko‘kalamzorlashtirish ishlarini o‘z vaqtida bajarmaslik, ekologik hisob-kitoblardagi nomutanosibliklar va atrof-muhitga zarar yetkazmagan boshqa qator holatlar kiritilgan.
Huquqbuzarlikning past ta’sir darajasiga ega ekanini aniqlashda zararning mavjudligi va miqdori, oqibatlarning davomiyligi, kamchilikni tez bartaraf etish imkoniyati, ekologik hamda ijtimoiy xavfsizlikka ta’siri kabi mezonlar hisobga olinadi. Shuningdek, Ekologik nazorat inspeksiyasi har bir holatni alohida o‘rganib, qonunbuzilishni bartaraf etish bo‘yicha tavsiyalar beradi.
