Yevroittifoq kengashi Ukrainaga 50 mlrd yevro ajratishni ma’qulladi 

Yevropa Ittifoqi migratsiya siyosati va boshqa tashqi siyosat muammolariga ko‘proq mablag‘ ajratadi. Tegishli o‘zgartirishlar 28 fevral kuni YeIga a’zo davlatlar vakillari tomonidan ma’qullangan, Yevropa ittifoqining uzoq muddatli budjetini qayta ko‘rib chiqish doirasida ko‘zda tutilgan. 

Yevropa ittifoqining 2021-2027 yillarga mo‘ljallangan ko‘p yillik moliyaviy dasturiga o‘zgartirishlar Yevropa Ittifoqi budjeti doirasida Ukraina jamg‘armasini yaratishni va Ukrainaga 50 milliard yevro miqdorida moliyaviy yordam paketini taqdim etishni nazarda tutadi (17 milliard grant va 33 milliard kredit shaklida). Shuningdek, Yevropa Ittifoqining migratsiya va mudofaa siyosati uchun qo‘shimcha 11 milliard yevro ajratiladi.

Yevropa Ittifoqining inqirozlarga chidamliligini oshirish uchun ajratilayotgan mablag‘lar miqdori ham ortib bormoqda. Hujjatda Ukrainaga yordamni hisobga olgan holda, jami 64,6 mlrd miqdorida avval nazarda tutilgan xarajatlar rejalashtirilgan. 

Yevropa ittifoqi pullari nimaga sarflanadi?

Yevropa Ittifoqining uzoq muddatli budjetiga o‘zgartirishlar kiritish doirasida Ukraina uchun 50 milliard yevro ajratish to‘g‘risidagi qaror Yevropa Ittifoqi yetakchilari tomonidan 1 fevral kuni Bryusselda bo‘lib o‘tgan maxsus sammitda qabul qilindi. Ukraina jamg‘armasining tashkil etilishi YeI tarixida pretsedent bo‘ldi, chunki birinchi marta tashkilot budjetidan uning tarkibiga kirmaydigan davlatga yordam berish uchun bunday katta mablag‘ ajratilmoqda. Jamg‘armaning maqsadi - Ukraina davlat institutlari va moliya tizimi barqarorligini qo‘llab-quvvatlash. Kredit bo‘yicha foiz stavkalari subsidiyalanadi.

Ukraina jamg‘armasi uchta asosiy komponentdan iborat. Birinchisi, Ukrainaning moliyaviy barqarorligini qo‘llab-quvvatlashni o‘z ichiga oladi, ikkinchisi Ukrainani tiklash va rekonstruksiya qilish uchun davlat va xususiy investitsiyalarni jalb qilishga mo‘ljallangan, uchinchisi esa - texnik yordam uchun.

Yevropa Ittifoqining 2021-2027 yillarga mo‘ljallangan uzoq muddatli budjeti hozirgacha 1,1 trillion yevroni tashkil qilgan. Germaniya Yevropa Ittifoqining eng yirik donori bo‘lib, barcha mablag‘lar deyarli to‘rtdan bir qismi uning hissasiga to‘g‘ri keladi. Shu bilan birga, Berlin hukumati Germaniya Yevropa Ittifoqining yagona bozoridan boshqa Yevropa iqtisodiyotiga qaraganda ko‘proq foyda ko‘rayotganini ta’kidlaydi.