Bugundan barcha metan zapravkalar ochiladi

Tabiiy gaz bosimi me’yoriy sxemaga qaytgani munosabati bilan bugundan e’tiboran mamlakatdagi barcha avtomobillarga gaz to‘ldirish kompressor shoxobchalari ochiladi. Bu haqda Energetika vazirligi matbuot xizmati xabar berdi.

Mamlakatdagi metan zapravkalar 17 fevral kuni kuchli shamol va qor bo‘ronlari tufayli Buxoro viloyatidagi «L-Gazli-1» va «L-Gazli-2» yuqori kuchlanishli elektr uzatish tarmoqlarida nosozlik yuzaga kelishi ortidan yopilgandi. O‘shanda «Gazli» kompressor stansiyasidagi 8 ta hamda «Gazli» gazni qayta ishlash zavodiga qarashli «Uchqir» kompressor stansiyasidagi 2 ta gaz haydash agregati favqulodda to‘xtagandi.

Gaz bosimi kamaygani tufayli birinchi navbatda, aholi xonadonlari va ijtimoiy soha obektlarini tabiiy gaz bilan ta’minlash maqsadida metan zapravkalar faoliyatiga cheklov kiritilgandi.

Avariyaviy holat bartaraf qilingach, gaz agregatlari to‘liq kuch bilan ishlay boshlashi va metan zapravkalar ham belgilangan reja-grafik asosida (har kuni soat 8:00 dan 15:00 gacha vaqt oralig‘ida) bosqichma-bosqich ishga tushirilishi ma’lum qilingandi.

22 fevral kuni vazirlik metan zapravkalar faoliyatiga kiritilgan cheklovlar mahalliy hokimliklar bilan kelishilgan holda, avvaldan belgilangan reja-grafik asosida bosqichma-bosqich olib tashlanishi boshlanganini xabar qildi. Biroq bunday cheklovlar 6 martga qadar saqlanib qoldi.