Chexiya Ukraina uchun 300 mingta o‘q-dori sotib oladi

Chexiya Ukrainaga birinchi marta 300 mingta o‘q-dori yetkazib berish uchun yetarli mablag‘ to‘plashga muvaffaq bo‘ldi. Bu haqda 8 mart, juma kuni Chexiya bosh vaziri Petr Fiala ijtimoiy tarmoqda ma’lum qildi. Fiala Chexiyaning Yevropa Ittifoqiga kirmagan mamlakatlardan Ukraina uchun o‘q-dorilar sotib olish tashabbusiga qo‘shilgan barcha mamlakatlarga minnatdorchilik bildirdi, shuningdek, Praga bu borada Kiyevga ko‘proq harbiy yordam o‘tkazish niyatida etkanini qo‘shimcha qildi. «Bizning ishimiz va Ukrainaga yordamimiz shu bilan tugamaydi. Ukrainani Rossiyaga qarshi dadil kurashida qo‘llab-quvvatlash uchun hamkorlar izlashda davom etamiz», - deb yozadi siyosatchi.

Chexiyaning Ukrainaga harbiy yordam ko‘rsatish tashabbusi 

Fevral oyi o‘rtalarida Myunxen xavfsizlik konferensiyasi chog‘ida Chexiya prezidenti Petr Pavel bir necha hafta ichida Ukrainaga 500 mingta 155 mm kalibrli artilleriya va 300 mingta 122 mm kalibrli artilleriya snaryadlarini yetkazib berish niyatida ekanligini ma’lum qildi. Pavel uchinchi mamlakatlardan o‘q-dorilarni sotib olishni taklif etdi. Uning so‘zlariga ko‘ra, bunday kelishuv Ukrainaning boshqa ittifoqchi davlatlari moliyaviy ishtiroki bilangina mumkin bo‘ladi. 

Bir kun avval, 7 mart kuni Chexiya prezidenti snaryadlarni sotib olish tashabbusiga Yevropaning 18 davlati, jumladan, Fransiya va Germaniya qo‘shilganini ma’lum qilgan edi. Uning so‘zlariga ko‘ra, Chexiya o‘q-dorilarning birinchi partiyasini xarid qilish uchun yetarli mablag‘ni yig‘ishga muvaffaq bo‘lgan.