G‘azo sektoriga qo‘shimcha yordam yetkazish uchun rejalashtirilgan dengiz gumanitar yo‘lagi yaqin bir necha kun ichida ishga tushadi. «Biz yo‘lakni ochishga yaqinmiz, umid qilamanki, u shanba, yakshanba kuni ochiladi», dedi Yevropa komissiyasi (YeK) raisi Ursula fon der Lyayyen 8 mart, juma kuni Kiprning Larnaka port shahrida Kipr prezidenti Nikos Xristodulidis bilan uchrashuvda.
Gumanitar yuklar Larnakadan dengiz orqali G‘azo sektoriga yetkaziladi. Fon der Lyayyen so‘zlariga ko‘ra, loyihani Yevropa Ittifoqidan tashqari Birlashgan Arab Amirliklari va Qo‘shma Shtatlar ham qo‘llab-quvvatlaydi, biroq unda asosiy rolni ko‘p oylar davomida G‘azo sektoriga insonparvarlik yordami yetkazib berishni tashkil etishga urinib kelayotgan Kipr o‘ynaydi.
Yirik dengiz portining yo‘qligi muammosi
Birinchi kema yanvar oyida Falastin hududiga jo‘nab ketgan, biroq G‘azo sektori qirg‘oqlaridagi portlar yirik kemalar uchun yetarlicha chuqur bo‘lmagani uchun Misrda to‘xtashga majbur bo‘lgan.
Muammoni hal qilish uchun Qo‘shma Shtatlar xalqaro hamkorlar bilan birgalikda Falastin mintaqasi qirg‘oqlarida bandargoh qurish niyatida, ammo hozircha vaqtinchalik yechim sifatida gumanitar yordamni yirik kemalardan kichik kemalarga qayta yuklash taklif qilinmoqda. Shuningdek, G‘azo sektoriga olib borish uchun Isroil va Misrga gumanitar yuklarni topshirish varianti ham bor.
YeI portidan yuklarni jo‘natish Falastinning HAMAS harakati jangchilari uchun G‘azo sektoriga qurol-yarog‘ olib o‘tishning oldini olishga mo‘ljallangan.
Germaniya loyihada ishtirok etishi mumkin
Germaniya ham G‘azo sektoridagi muhtojlarga dengiz orqali yordam yetkazib berishda ishtirok etadi. Spiegel nashri yozishicha, ayni damda Bundesver Germaniya floti dengiz ko‘prigining ishlashiga qanday hissa qo‘shishi mumkinligini o‘rganmoqda. Nashr ta’kidlashicha, hozircha gap faqat tegishli so‘rov kelib tushgan taqdirdagina dastlabki tahlil haqida bormoqda. Nemis dengiz floti loyihada haqiqatan ham ishtirok etadimi yoki yo‘qmi, bu masala noma’lum.
Isroil-Falastin mojarosi
7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.
