Qirg‘izistonning Jalolobod viloyati aholisi O‘zbekistonning madaniy-tarixiy, ziyorat va tibbiyot turizmiga katta qiziqish bildirmoqda.
O‘zbekistonning O‘sh shahridagi bosh konsulxonasi xodimlari Qirg‘izistonning Jalolobod viloyatidagi "Bay-Muras Xolding" mas’uliyati cheklangan jamiyati direktori Mamataji o‘g‘li Husanboy bilan muzokara o‘tkazdi, deb xabar bermoqda "Dunyo".
Uchrashuvda O‘zbekiston–Qirg‘iziston turkompaniyalari o‘rtasida hamkorlik aloqalarini o‘rnatish, birgalikda turizm va savdo yarmarkalarini tashkil etish, ushbu mamlakatdan sayyohlar oqimini ko‘paytirish masalalari muhokama qilindi.
Mamataji o‘g‘li Husanboy Xiva 2024 yilda "Islom dunyosining turizm poytaxti" deb e’lon qilinganligini alohida qayd etdi. U, shuningdek, ushbu yil doirasida joriy may oyida Xiva shahrida o‘tkaziladigan yirik uchrashuvlar, ko‘rgazmalar va madaniy tadbirlarda Jalolobod viloyati rasmiy idora hamda sayyohlik kompaniyalari vakillarining ishtirokini tashkil etishga amaliy yordam berishga tayyorligini bildirdi.
Muloqot yakunida Jalolobod shahrida O‘zbekiston va Qirg‘iziston sayyohlik kompaniyalari hamda ommaviy axborot vositalari xodimlari ishtirokida davra suhbati, ishbilarmon doira vakillari o‘rtasida V2V formatidagi muzokaralar tashkil etish, shuningdek, O‘zbekiston bo‘ylab sayyohlik turlarini ishlab chiqish to‘g‘risida kelishib olindi.
