Isroil Madrimov mutlaq jahon chempioniga qarshi ringga ko‘tarilishi mumkin

Super yarim o‘rta vazn toifasida WBA kamari sohibi Isroil Madrimov (10-0-1, 7 KO) keyingi jangini yarimo‘rta vazn toifasida mutlaq jahon chempioniga qarshi o‘tkazishi mumkin. 

Tribuna.uz manbasiga ko‘ra, Isroil vazn toifasidan qat’i nazar BoxRec reytingida peshqadamlik qilayotgan Terens Kroufordaga qarshi ringga ko‘tariladi va WBA kamarini himoya qiladi. 

Jang shu yilning avgust oyida AQShning Kaliforniya shtatida o‘tkazilishi kutilmoqda. 

Ma’lumot uchun, amerikalik 36 yoshli charmqo‘lqop ustasi professional faoliyatida 40 ta jang (31 nokaut) o‘tkazib, ularning barchasida g‘alaba qozongan.

Eslatib o‘tamiz, yengilmas Krouford so‘nggi bor 2023 yilning iyul oyida hamyurti Errol Spensni muddatidan avval mag‘lub etgandi. Isroil Madrimov esa shu yilning mart oyida rossiyalik Magomed Qurbonovdan ustun kelib, WBA kamarini qo‘lga kiritdi.