Xitoy banklari «Rossiya iziga» ega yuandan voz kechyapti

Xitoyning ba’zi banklari yuanni yashirincha «toza» va «iflos»ga bo‘lishni boshladilar. Ular ikkinchisini Rossiya kompaniyalari bilan operatsiyalarda ishlatiladigan valuta deb hisoblaydi. Bu haqda 26 iyul, juma kuni biznes vakillariga tayanib, «Vedomosti» gazetasi xabar berdi.

Manbalardan biriga ko‘ra, Xitoy banki AQSh sanksiyalariga duchor bo‘lgan Moskva birjasida sotib olingan yuanni qabul qilishni istamagan holat bo‘lgan. Yana bir suhbatdosh Xitoy banklari «rus iziga ega bo‘lgan har qanday yuan bilan ishlashni istamasligini, «sof» yuanni afzal ko‘rishini» ta’kidlab, yanada aniqroq gapirdi. Xitoy banklari, agar valuta Rossiya kompaniyalari yoki jismoniy shaxslari bilan operatsiyalarda ishlatilgan deb gumon qilsa, yuan bilan muomala qilishdan bosh tortishi mumkin, dedi boshqa manba. Shu bilan birga, bankirlar yuan qayerdan sotib olinganini aniq bila olmaydi, biroq «Vedomosti» suhbatdoshlari ta’kidlaganidek, «ular Rossiya banklaridan keladigan yoki hujjatlarga ko‘ra Rossiya bilan bog‘langan valutadan bosh tortadi».

Nashr suhbatlashgan ekspertlarga ko‘ra, Xitoy biznesi Rossiya bilan bitimlar uchun AQSh tomonidan sanksiyalar qo‘llanishidan xavotirda. Bundan tashqari, Xitoyning AQSh va YeI bilan tashqi savdosi hajmi Pekin Moskva bilan eksport-import operatsiyalaridan oladigan puldan bir necha baravar ko‘p.

2023 yil oxirida Rossiya biznesi uchun Xitoy banklari bilan dollarda hisob-kitob qilishga aloqador qiyinchiliklar boshlangan. Bu AQSh prezidenti Jo Bayden uchinchi davlatlar banklari Rossiya harbiy-sanoat kompleksiga yordam bersa, ularga qarshi sanksiyalar joriy etilishini ma’lum qilganidan keyin yuz berdi.