Birni ko‘rib fikr qil, birni ko‘rib shukr... Xarobadagi Jannat

Jannat bu — navbatdagi filmimiz qahramonining ismi. Lo‘li elatiga mansub bu ayol Farg‘ona shahri Beshbola mahallasida yashaydi. Ayol va uning oilasi yashayotgan sharoit har qanday odamni shukr qilishga undasa, ajab emas.

Jannat opa kunlik hayoti, odamlarning lo‘lilar haqidagi noto‘g‘ri tasavvurlari haqida so‘zlab berdi:

“Ertalab soat 4:00 da uyg‘onaman. Qizim bilan birga “baklashka” idish, qog‘ozlarni chiqindixona, ko‘chalardan yig‘ib kelamiz. Xo‘jayinim kasal, ishlay olmaydi.

Ikki farzandim bor, to‘ng‘ich qizimni turmushga uzatdim. Uyimizga yaqin zavod, korxona, do‘konlar qarshisidan “baklajka”lar terib kelamiz. Ish jarayonida har xil holatga, turfa odamlarga uchraymiz. Ba’zilar bizni o‘g‘ri deb o‘ylaydi.

Tong sahardan qosh qoraygunicha mehnat qilamiz, doimo harakatda bo‘lishga intilamiz. Kun bo‘yi yig‘ganimizni kerakli joyga topshiramiz. Kuniga 80 ming atrofida pul topamiz. Uning yarmi ro‘zg‘orga, yarmi xo‘jayinimning dori-darmoniga ketadi.

Uyimiz ham yo‘q edi, 10 yil ijarama-ijara yurdik. Turmush o‘rtog‘im yonimda turib qizlarim yordam berib, mana shu uyni qurdik.

Har kuni xo‘jayinimning dardiga shifo so‘rab duo qilaman. Tongda ulardan duo olib, ishga chiqib ketaman”, deydi u.

Sarvar Ziyoyev, Kun.uz
Montaj ustasi: Sardor Mamirov