Suv havzalarida motorli transport vositalari harakatiga ruxsat beriladi

Hukumat qaroriga asosan, 2025 yil 1 maydan boshlab tabiiy va sun’iy suv havzalarida motorli transportlardan foydalanishga ruxsat beriladi. Bunda transportlar yo tezligi 40 km/soatdan oshmaydigan bo‘lishi, yoki tezlikni avtomatik pasaytirish uskunasi bilan jihozlanishi, shuningdek, GPS uskunasi orqali milliy GPS monitoring-navigatsiya tizimiga ulangan bo‘lishi kerak.

Illyustrativ foto

“Suv havzalarida motorli (ichki yonuv dvigatelli) va elektromotorli suv transporti vositalaridan foydalanish tartibini yanada takomillashtirish hamda fuqarolar xavfsizligini ta’minlash chora-tadbirlari to‘g‘risida” Vazirlar Mahkamasi qarori qabul qilindi.

Qarorga asosan, 2025 yil 1 maydan boshlab tabiiy va sun’iy suv havzalarida faqat tezlikni avtomatik pasaytirish uskunasi bilan jihozlangan (harakatlanish maksimal tezligi 40 kilometr/soatdan oshmaydigan motorli qayiqlar bundan mustasno), GPS uskunasi o‘rnatilgan hamda milliy GPS monitoring va navigatsiya tizimiga ulangan motorli va elektromotorli suv transport vositalaridan foydalanishga ruxsat etiladi.

Ta’kidlanishicha, “suv havzalarida turizm xizmatlarini rivojlantirish, shuningdek, fuqarolar hayoti, sog‘lig‘i va xavfsizligini ta’minlash hamda suv resurslari ifloslanishining oldini olish, ulardan oqilona foydalanishni yo‘lga qo‘yish” maqsadida shunday qarorga kelingan.

Suv transport vositalarining ruxsat etilgan harakatlanish maksimal tezligi 40 kilometr/soat, kemalar to‘xtash joylari hamda aholi turar joylari chegaralarida – 20 kilometr/soat, plyajlar va aholining ommaviy dam olish joylari chegaralarida esa – 5 kilometr/soat etib belgilanadi.

2025 yil 1 yanvardan boshlab yuridik va jismoniy shaxslar tomonidan suv transporti vositalaridan (bundan elektromotorli suv transporti vositalari mustasno) foydalanish natijasida atrof -muhit ifloslantirilgani uchun quyidagi miqdorda yillik kompensatsiya to‘lovlari undiriladi:

motorli qayiq va gidrosikllar uchun BHMning 10 baravari;
kater uchun BHMning 15 baravari;
yaxtalar uchun BHMning 25 baravari.

Motorli suv transporti vositalari kompensatsiya to‘langanligini tasdiqlovchi hujjat taqdim etilganidan so‘ng yillik texnik ko‘rikdan o‘tkaziladi. Kompensatsiya undirishdan tushgan mablag‘lar Ekologiya jamg‘armasiga o‘tkaziladi va suv havzalari ifloslanishining oldini olish bo‘yicha chora-tadbirlarni moliyalashtirishga sarflanadi.

Eslatib o‘tamiz, 2020 yil 10 iyuldagi hukumat qarori bilan, Chorvoq suv omborida barcha turdagi motorli suv transporti vositalarining harakatlanishi taqiqlangan edi. Lekin bu taqiq amalda ishlamay keldi. Faqatgina 2024 yil 20 iyul kuni suv omborida skuter va katamaran to‘qnashuvi ro‘y berib, ikki kishi halok bo‘lganidan keyingina taqiq amaliyotga tatbiq etildi.