Forishda 64 yoshli erkak o‘qituvchi voyaga yetmagan o‘quvchi qizga shilqimlik qildi

Jismoniy tarbiya o‘qituvchisi darsda o‘quvchining yakka o‘zini olib qolib, yuzidan ushlagan holda unga shahvoniy shilqimlik qilgan. Sud o‘qituvchiga 5 sutka ma’muriy qamoq jazosi qo‘lladi.

Foto: Kun.uz

Jizzax viloyatining Forish tumanida o‘quvchi qizga shilqimlik qilgan o‘qituvchi ma’muriy qamoq jazosiga tortildi. Kun.uz sud hujjati bilan tanishdi.

Sud qarorida keltirilishicha, 1960 yilda tug‘ilgan O.X. Forish tumanidagi maktablardan birida o‘qituvchi bo‘lib ishlagan. U 2024 yil 5 dekabr kuni soat 14:30 larda maktab o‘quvchisi bo‘lgan voyaga yetmagan qizni jismoniy tarbiya darsida yakka o‘zini olib qolgan. So‘ngra qizning yuzidan ushlab, unga shahvoniy shilqimlik qilgan.

O.X. sudda huquqbuzarlik harakatiga qisman iqrorlik bildirib, o‘quvchi qizning yuzidan ushlab erkalaganini, unga shilqimlik qilmaganini bildirgan hamda qilmishidan pushaymon ekanini aytgan.

Jabrlanuvchining qonuniy vakili esa o‘qituvchini kechirmasligini, bu kabi holat oldin ham bir necha marotaba bo‘lganini, qizi qo‘rqib qolganini ma’lum qilgan hamda suddan qonuniy chora ko‘rishni so‘ragan.

Jinoyat ishlari bo‘yicha Forish tumani sudi qarori bilan O.X. MJtKning 41-1-moddasi (shahvoniy shilqimlik qilish) 1-qismida nazarda tutilgan huquqbuzarlikni sodir etgan deb topilgan. Unga 5 sutka ma’muriy qamoq jazosi tayinlangan.

Oldinroq Yangiyo‘l shahridagi stomatologiya klinikasida ishlovchi shifokor mijozga shilqimlik qilgani uchun 5 sutkaga qamalgandi.

#shilqimlik #o‘qituvchi #Forish tumani