O‘tgan yilda «Tottenhem» APL o‘yinlarida birinchi bo‘lib gol o‘tkazishni kanda qilmadi. 2025 yilni esa «shporlar» tezkor gol urish bilan boshladi, ammo jamoada qayta tug‘ilish ro‘y bermadi. Solankening zarbasidan ikki daqiqa o‘tib Gordon hisobni tenglashtirdi, bo‘lim oxirida esa «Nyukasl»ning asosiy to‘purari Isak katta sahnaga chiqdi. Shved hujumchisi avvaliga o‘ta qulay vaziyatdan foydalana olmadi, ammo ikkinchi urinishda qatorasiga sakkizinchi o‘yindagi golini nishonladi. «Qarg‘alar» tarixida bunday seriyaga faqat ikki futbolchi — afsonaviy Alan Shirer (1996) va Jo Uillok (2021) erishgan.
«Tottenhem» himoyasidagi muammolar hech qayerga yo‘qolmagandi. Romero, van de Ven, Devis va Udodji hamon jarohatda. Ikkinchi goldagi asosiy aybdor Dregushin tanaffusdayoq almashtirib tashlandi, Angelos Postekoglu himoya markaziga — 18 yoshli nominal tayanch havbek Greyga sherik sifatida qanot futbolchisi Spensni tushirdi. O‘yinning birinchi soati ortda qolganida shu kunlarda virusga chalingan va yarim soatdan ortiq o‘ynay olmaydigan Son Hyon Min, Meddison va Bissuma o‘yinni kuchaytirish uchun tashlandi. Ular hujumkorlikni oshirishdi, ammo hatto durangni ham ta’minlay olishmadi. «Shporlar» bu mavsumdagi o‘yinlarining yarmida yutqazib, turnir jadvalining ikkinchi qismida qolmoqda, Eddi Hau jamoasi esa qatorasiga olti g‘alabadan keyin top-4 uchun kurashni davom ettirmoqda.
Eski yilni g‘alaba bilan yakunlagan «Manchester Siti» yanvardagi ilk o‘yinini ham tetik o‘tkazdi. Nihoyat APLdagi ilk golini urgan Savinio «shaharliklar» safidagi asosiy harakatlantiruvchi kuch bo‘ldi va uning harakatlaridan keyin to‘p «Vest Hem» himoyachisi Tsoufalning oyog‘i orqali darvoza to‘riga borib tushdi.
Bo‘lim oxirida Holand uning uzatmasidan keyin bo‘sh burchakni ishg‘ol etib, hisobdagi farqni oshirdi. To‘rt tur davomida gol ura olmagan norvegiyalik hujumchi oxirgi ikki uchrashuvda o‘z nomini tabloga yozdirib qo‘ymoqda. Ikkinchi bo‘lim boshlarida u «ikkinchi qavat»dan ham gol urib, hisobni yirik ko‘rinishga keltirdi.
«Vest Hem» Hulen Lopetegi boshqaruvida eng kuchsiz davrini o‘tkazmoqda — «bolg‘achilar» muxlislari buni translatsiya rejissyori tribunada o‘tirgan Devid Moyyesni ko‘rsatganida yana bir bor yaqqol his qilishdi. «Siti» esa ishonch bilan inqirozdan chiqayotganini namoyish etdi. «Lester» ustidan qozonilgan quruq g‘alaba noyabr-dekabr oylaridagi asabiylik tarqagani va jamoa yana oldingidek erkin o‘ynay boshlaganini ko‘rsatdi. Amaddagi chempionlar o‘yinning qolgan vaqtida osonlik bilan yirik g‘alabani saqlab qoldi va «Aston Villa» turnir jadvalida o‘zini quvib o‘tishiga imkon bermadi. Endi Gvardiola shogirdlari beshinchi o‘rindagi «Nyukasl»ni kichik farq bilan ta’qib qilmoqda, Chempionlar ligasiga yo‘llanma beruvchi oxirgi o‘rin bilan oradagi farq esa ikki ochko.
Pep esa o‘yindan keyin bu hali oldingi «Manchester Siti» qaytganini anglatmasligini, «shaharliklar» «Everton»ga qarshi yaxshiroq o‘ynaganini (0:0) aytdi. «Savinio zo‘r o‘ynadi, Holand ikkita gol urdi. Haddan tashqari ko‘p ijobiy narsalar bor, ammo agar mendan so‘rasangiz — jamoa oldingi yillardagi kabi o‘ynayaptimi desangiz — shunday deyman: «Yo‘q! Mutlaqo yo‘q!».
«Manchester Siti» «Chelsi» inqiroz holatiga tushib qolgani tufayligina YeChLga yo‘llama beruvchi o‘ringa shu qadar yaqinlashishga muvaffaq bo‘lgan. Enso Mareska muvaffaqiyatsizlikning asosiy sababi yosh jamoaga bo‘layotgan kuchli bosim emasligi, ammo bu so‘nggi natijalarning natijalaridan biri ekanini aytdi. So‘nggi to‘rt turda — ikki durang va ikki mag‘lubiyat qayd etildi, «Kristal Pelas» bilan derbi «Fulhem»ga qarshi o‘yinni eslatib yubordi. Bu o‘yinda ham Palmer tezkor gol urdi, unga Sancho shvedka usulida ajoyib pas yo‘lladi. Bu o‘yinda ham muvaffaqiyatni rivojlantirishning imkoni bo‘lmadi. Farqi shundaki, «Chelsi» «Fulhem»ga yutqazgandi (1:2), «burgutlar» bilan esa durang o‘ynaldi. Mezbonlar javob goliga haqli o‘yin namoyish etishdi va yakunda namunali kombinatsiyada Sarr to‘pni himoyachilar orasidan o‘tkazib berdi, Eze bir teginishda bo‘sh darvoza qarshisida paydo bo‘lgan Matetaga golli pas berdi.
«Liverpul»ning asosiy ta’qibchisi Braytonda qoqildi. Holbuki barchasi «Arsenal» uchun muvaffaqiyatli boshlangan va «chaykalar» pressingidan chiqib ketgan mezbonlar qarshi hujum uyushtirdi va Nvaneri o‘tkir burchakdan gol urdi. U «kanonirlar»ning 18 yoshgacha APLda ikki gol urgan ilk futbolchisi bo‘ldi.
Hisobda oldinga chiqib olgach, «Arsenal» shoshilmadi. Ayrim holatlarda hakam mehmonlar to‘pni o‘yinga kiritishini tezlashtirish uchun soatiga ishora qildi va bo‘lim oxirida burchakdan to‘pni o‘yinga kiritishga shoshilmagan Nvaneriga sariq kartochka ham ko‘rsatdi. Mehmonlar 61-daqiqada javob goli o‘tkazib yubormaguncha vaqt cho‘zishda davom etishdi. Bu vaziyatda esa Saliba to‘pni qaytarishga uringanida boshi bilan Joao Pedroning boshiga to‘qnashib ketdi.
E’tiborli jihati, shunga o‘xshash epizod shu kuni «Tottenhem» – «Nyukasl» o‘yinida ham ro‘y bergan (bu yerda Gordonning burni raqibning yelkasidan zarbaga uchrab, qonab ketgandi) – bu holatda penalti berilmagani, bu o‘yinda esa Entoni Teylov 11 metrlik nuqtani ko‘rsatdi. Joao Pedro zarba berishdan oldin to‘pni o‘pdi va uni qariyb to‘qqizlikka yo‘lladi – 1:1.
Arteta darhol reaksiya qildi. Jamoa sardori Edegor Jorjinio o‘rniga maydonga tushdi. O‘yin ochildi va tezlashdi, ikki tomon ham ko‘proq vaziyatlar yarata boshladi. Ammo hisob o‘zgarmay qoldi.
«Arsenal» «Liverpul» bilan oradagi farqni beshtaga qisqartirdi, ammo londonliklar ikkita ko‘proq o‘yin o‘tkazgan. Slot jamoasi yakshanba kuni o‘z maydonida «MYu»ni qabul qiladi. «Brayton» esa bu mavsumda o‘z uyida «katta oltilik»ning to‘rt vakiliga qarshi o‘ynadi va hozircha yutqazmadi (+3=1).
To‘rtinchi divizion vakili «Barbastro» Ispaniya kubogi tarixida ushbu divizion vakili bo‘la turib, turnirdan la liganing ikki vakilini chiqarib yuborgan ilk jamoa sifatida shuhrat qozongandi. Ammo 2023 yil dekabrida mag‘lub etilgan «Almeriya» va bir oy muqaddam taslim etilgan «Espanol» — «Barselona» darajasida emas. Lekin ushbu jamoa o‘tgan mavsumda kataloniyaliklarga ham jiddiy muammo tug‘dira olgandi (2:3).
Bu safar esa mehmonlar aralash tarkibni tushirganiga qaramay, osonlik bilan yirik g‘alabaga erishdi. Kataloniyaliklar darvozasida nihoyat Shchensni debyut qildi, himoyada Arauxo jarohatidan keyin ilk bor mavsumda ilk bor boshlang‘ich tarkibda tushdi, Pedri va bu mavsumda asosiy tarkibdan tushib qolgan Frenki de Yong maydon markazida juftlik hosil qildi, Levandovski hujum markazida tushdi. Bir yil muqaddam polyak bu stadionda g‘alaba keltirgan penaltidan gol urgandi. Bu safar — ikkinchi bo‘lim boshidayoq dublni rasmiylashtirdi, keyin esa butsasining ostki qismi bilan raqib oyog‘iga zarba berdi. Turnirning bu bosqichida (1/16 final) VAR yo‘qligi uni ehtimoliy qizil kartochkadan qutqarib qoldi.
Yakunda Levandovski 82 gol bilan «Barsa» tarixidagi top-30 to‘purar ro‘yxatiga kirdi. Shanba kuni u Chiki Begiristayndan o‘zib ketdi va uning navbatdagi nishonlari — 85 tadan gol urgan Xavi va Xulio Salinas. «Barbastro» bilan o‘yin qahramoni Pablo Torre esa raqib xatosidan foydalanib bir gol urdi va yana ikki golga uzatma berdi.
«Marbelya» — «Atletiko» 0:1
Gol: Grizmann (16).
«Atletiko» – Musso, Galan, Langle, Le Norman, Molina, Gallaher (Lorente, 75), Barrios (Koke, 46), De Paul (Korrea, 75), Simeone, Alvares (Syorlot, 60), Grizmann.
«Atletiko» esa ortiqcha kuch sarflamasdan, birgina gol bilan kifoyalandi. Bu gol Grizmann va Juliano Simeone uyushtirgan kombinatsiya orqali urildi, fransuz futbolchisi argentinalik jamoadoshining o‘tkir burchakdan yo‘llagan zarbasi qaytganidan keyin to‘pga birinchi bo‘lib yetib keldi. «Matraschilar» ko‘proq gol urishi mumkin edi, ammo vaziyatlaridan foydalana olmadi, bir goli bekor qilindi, yana bir vaziyatda «Marbelya»ni darvoza to‘sini qutqardi.
«Atalanta» va «Inter» superkubok bilan bandligida «Napoli» birinchilikni qo‘lga olishga harakat qilmoqda va so‘nggi vaqtlarda yorqin harakat qilayotgan David Neres tufayli bu yo‘ldagi ilk qadamni tashladi. Kvaratsxeliya jarohat tufayli o‘ynay olmayotganida braziliyalik futbolchi mavsumning eng yaxshi futbolchilaridan biri sifatidagi maqomini tasdiqladi, uning goli esa nafaqat tur, balki butun chempionat hit-paradlariga kirishi aniq. Bu golni Lukaku boshlab berdi, Neres esa bir necha himoyachini ortda qoldirib, to‘pni to‘sin ortiga aniq yo‘lladi.
«Fiorentina» o‘tgan turda Turinda «Yuventus»ga qarshi o‘yinda tashabbusni to‘liq topshirib qo‘yganiga qaramay, ikki bor javob qaytarib, ochkoga ega bo‘lgandi (2:2). Shanba kungi o‘yinda ham Moyze Kin yana gol urdi, ammo Antonio Kontening baxtiga bu gol bekor qilindi. Ikkinchi bo‘lim boshida esa Lukaku penaltini aniq ijro etib, murabbiyini tinchlantirdi. Ko‘p o‘tmay Maktominay hisobni yirik ko‘rinishga keltirdi. Neapolitanliklar endi uch ochkoga ortda qolayotgan «Atalanta» qanday javob qaytarishini kutadi. «Inter» esa soyadagi yetakchi bo‘lib qolmoqda, milanliklarda to‘rt ochko kamroq bo‘lganiga qaramay, zaxirasida ikki o‘yin bor.
