Dehli shahrida "O‘zbekiston" bog‘i barpo etiladi

Uchrashuv chog‘ida O‘zbekiston va Hindiston xalqlarining uzoq asrlarga borib taqaladigan do‘stlik aloqalari so‘nggi yillarda mazmunan boyib, izchil rivoj topayotgani qayd etildi. 

Davlatlar o‘rtasidagi serqirra munosabatlarda mintaqalararo aloqalarning salmog‘i oshib bormoqda. Shundan kelib chiqib, ikki mamlakat poytaxtlarining ishbilarmon, ilmiy-akademik va boshqa doiralari vakillari hamkorligini yanada faollashtirish istiqbollariga alohida e’tibor qaratildi.

Shahar xo‘jaligini yuritish, obodonlashtirish va ko‘kalamlashtirish, aholi uchun qulay va zamonaviy infratuzilma yaratish va boshqa dolzarb masalalarda tajriba almashish ikki tomon uchun ham qiziqarli va manfaatli bo‘lishi ta’kidlandi.  

Vinay Kumar Saksena elchixona tomonidan ilgari surilgan Dehli shahrida "O‘zbekiston" bog‘ini yaratish, o‘zbek xalqining buyuk mutafakkirlaridan biri Alisher Navoiy haykalini o‘rnatish kabi takliflarni qo‘llab-quvvatladi hamda ushbu loyihalarni hayotga tatbiq etish bo‘yicha birgalikda ishlashga tayyorligini bildirdi.

Toshkent hokimligi va Dehli gubernatori ma’muriyati o‘rtasida delegatsiyalar almashish, joylarda birgalikda amalga oshiriladigan loyihalarni o‘rganish, ilm-fan, madaniyat, turizm, sport va boshqa yo‘nalishlarda turli qo‘shma tadbirlar tashkil etish va boshqa o‘zaro manfaatli masalalar yuzasidan fikr almashildi.