Coca-Cola tarkibida xlorat ko‘p bo‘lgani uchun Yevropadagi mahsulotlarini qaytarib oldi

Coca-Cola kompaniyasi Yevropaning ba’zi davlatlarida o‘z ichimliklari tarkibida xlorat kimyoviy moddasi me’yordan oshib ketgani aniqlanganidan so‘ng, ularni sotuvdan qaytarib olishini e’lon qildi. Bu haqda BBC xabar berdi.

Kompaniya Belgiya, Lyuksemburg va Niderlandiyadagi savdo javonlardan o‘z mahsulotlarini qaytarib olayotganini ma’lum qildi. Ta’kidlashicha, ushbu partiyadan beshta mahsulot Buyuk Britaniyaga o‘tgan yil oxirida yetkazib berilgan va allaqachon sotilgan.

Xlorat – suvni tozalashda va oziq-ovqat sanoatida xlorli dezinfeksiyalash vositalaridan foydalanilganda hosil bo‘lishi mumkin.

«Mustaqil ekspert tahlillari shuni ko‘rsatdiki, iste’molchilar uchun xavf juda kam», dedi kompaniya vakili.

Coca-Cola Britaniya iste’molchilaridan hech qanday shikoyat olmaganini va bu borada Buyuk Britaniya rasmiylari bilan hamkorlikni davom ettirishini aytdi.

Xloratning me’yordan oshib ketgan miqdori salomatlikka salbiy ta’sir ko‘rsatishi va qalqonsimon bez bilan bog‘liq muammolarga olib kelishi mumkin, ayniqsa bolalar va chaqaloqlarda.

Britaniya milliy sog‘liqni saqlash xizmati (NHS) diyetologi Karon Grazett shunday dedi: «Biz qanchalik oz miqdorda bo‘lmasin, feyyerverklar va dezinfeksiyalash vositalarida ishlatiladigan kimyoviy moddalarni alkogolsiz ichimliklarda iste’mol qilishni xohlaymizmi, deb o‘ylab ko‘rishimiz kerak».

Xlorat miqdori yuqori bo‘lgan oziq-ovqatlarni iste’mol qilish ko‘ngil aynish, qusish, diareya va qonning kislorodni o‘zlashtirish qobiliyatini pasayishiga olib kelishi mumkin, deb qo‘shimcha qildi mutaxassis kimyoviy moddalar bo‘yicha so‘nggi tadqiqotlarga tayanib.

Kompaniyaning Gent (Belgiya) shahridagi ishlab chiqarish zavodida muntazam sinovlar o‘tkazish chog‘ida xlorat miqdorining yuqoriligi aniqlangan. Sotilmagan mahsulotlarning aksariyati javonlardan olib tashlangan va kompaniya qolganlarini ham qaytarib olmoqda.

Coca-Cola vakilining aytishicha, kompaniya «o‘z mahsulotlarining sifati va xavfsizligini ustuvor vazifa deb biladi».