28 iyul kuni Saudiya Arabistoni o‘zining havo hujumidan mudofaa tizimlari qirollikdagi neft ob’yektlarini nishonga olgan o‘nlab dronlarni yo‘q qilganini ma’lum qilgandi. Saudiya Arabistoni Mudofaa vazirligi hujumlarni «Eron tomonidan qo‘llab-quvvatlanuvchi jangarilar Iroq hududidan amalga oshirgan», deb bayonot berdi.
Kunning ikkinchi yarmida AQSh Markaziy qo‘mondonligi va Saudiya qiruvchi samolyotlari bilan bir nechta qurol-yarog‘ omborlari va logistika ob’yektlariga yuqori aniqlikdagi zarbalar berganini ma’lum qildi.
Saudiya Arabistoni Mudofaa vazirligiga ko‘ra, hujum qilingan ob’yekt Iroq sharqida joylashgan bo‘lib, Eron tomonidan dron hujumlarini boshqarish uchun foydalanilgan.
AQSh harbiylari Erondagi Muhofizlar korpusini AQSh qo‘shinlari va Saudiya energetika infratuzilmasiga qilingan hujumlarni boshqarganlikda aybladi.
Avvalroq Centcom AQSh kuchlariga qarata uchirilgan bir nechta ballistik raketalarni o‘z ichiga olgan Eronning «kutilmagan hujum»ini barbod qilganini aytgandi. AQSh nashrlariga ko‘ra, raketalar Iordaniyadagi AQSh harbiy bazasi tomon yo‘naltirilgan bo‘lgan.
Iroqda qurbonlar bor. Eron Iordaniyaga hujum qildi
Iroqning Xalq safarbarlik kuchlari AQSh va Saudiya Arabistoni ularning Basradagi bosh qarorgohiga zarba berganini tasdiqladi.
Anadolu nashrining guruhga tayanib yozishicha, hujumlarda kamida 20 kishi halok bo‘lgan va yana 32 jarohatlangan. Bundan tashqari, Xalq safarbarlik kuchlarining bir qator bino-inshootlariga zarar yetgan.
Ammo, Eron mudofaa tizimi rasmiysi boshqa davlatlardan Saudiya ob’yektlari tomon otilgan snaryadlarga ularning aloqasi borligini qat’iyan inkor etdi.
Eron harbiylari ham chorshanba kuni ertalab Iordaniyadagi AQSh aviabazasi va Markaziy qo‘mondonlik markazi tomon bir nechta ballistik raketalar uchirgan.
Iordaniya harbiylarining hujumlarni tasdiqladi. Ma’lum qilinishicha, chorshanba kuni podshohlik havo hujumidan mudofaa tizimlari Eronning beshta raketasini tutib qolgan va urib tushirgan.
Shuningdek, Eron Islom inqilobi muhofizlari korpusi chorshanba kuni o‘z kuchlari bo‘g‘ozdagi uchta neft tankeriga zarba berganini bildirdi. Korpusga ko‘ra, «xavfli hamda noqonuniy yo‘nalish» bo‘yicha harakatlanayotgan kemalar ogohlantirishlarni e’tiborsiz qoldirgach majburan to‘xtatilgan.
Muhofizlar korpusi o‘z bayonotida strategik suv yo‘li ustidan to‘liq nazoratni saqlab qolishda davom etayotganini ma’lum qildi. Shuningdek, «AQShning noqonuniy harbiy aralashuvi» hamda mintaqadagi kemalarga beriladigan ko‘rsatmalari javobsiz qolmasligi haqida ogohlantirdi.
Ko‘rfaz bo‘yicha Ummonning taklifi rad qilindi
Chorshanba kuni Tehron Ummonning Ho‘rmuz bo‘g‘ozini mintaqaviy birgalikda boshqarish haqidagi taklifini rad etdi. Bu so‘nggi oylarda Ko‘rfaz savdosini bo‘g‘ib qo‘ygan boshi berk ko‘chadan chiqish umidlarini chippakka chiqardi.
Ummon ushbu muhim bo‘g‘oz atrofidagi ziddiyatni hal etishga qaratilgan yangi mintaqaviy kelishuvni taklif qilgan edi. Biroq, Tehron ushbu taklifning muvaffaqiyatga erishish imkoni yo‘qligini aytgan.
Reuters manbalariga ko‘ra, Ummon Ko‘rfaz davlatlari tomonidan qo‘llab-quvvatlangan va suv yo‘lidan o‘tayotgan kemalardan ixtiyoriy yig‘imlar undirishni o‘z ichiga oladigan rejani taqdim etgan. Taklifga ko‘ra, Eron yakka o‘zi nazoratni amalga oshirmasligi va yig‘imlar ixtiyoriy bo‘lishi kerak edi, deydi manba.
Eron yetakchilari esa AQSh va Saudiya Arabistoni strategik bo‘g‘ozga oid o‘zlarining «noreal rejalarini» ilgari surish uchun Ummonga bosim o‘tkazishga urinmoqda, deb hisoblaydi. Shu bois, Eron bo‘g‘oz orqali o‘tadigan barcha kirish yo‘nalishlari va chiqish yo‘nalishining bir qismi Eron nazorati ostida bo‘lishi kerakligini ta’kidlagan.
«Tehron Ummonni qadrli qo‘shni deb hisoblasa-da, ular bilan 50 ga 50 nisbatdagi qo‘shma nazorat kelishuvi Eron manfaatlariga xizmat qilmaydi», degan Eron rasmiy.
Hujumlar yana kuchaygani sababli chorshanba kuni neft narxi bir barreli uchun 3 dollardan ko‘proqqa qimmatlashdi.
Bundan tashqari, so‘nggi kunlardagi o‘zaro hujumlar jangovar harakatlardagi qisqa tanaffusga barham berdi. Bu tanaffus AQSh prezidenti Donald Tramp ikki haftalik bombardimon kampaniyasini to‘satdan bekor qilgani va Eron ham xuddi shunday yo‘l tutgandek ko‘ringanidan so‘ng yuzaga kelgan edi.
