Taker Karlson Bayden ma’muriyati Putinni o‘ldirishga uringani haqida gapirdi

Amerikalik jurnalist Taker Karlsonga ko‘ra, AQShning sobiq prezidenti ma’muriyati Vladimir Putinni o‘ldirishga uringan. Kreml esa jurnalistning so‘zlariga javob qaytarib, RF maxsus kuchlari prezident xavfsizligi uchun «barcha kerakli choralarni ko‘rishi»ni bildirdi.

Foto: AFP / Getty Images

AQShning sobiq prezidenti Jo Bayden ma’muriyati RF prezidenti Vladimir Putinni o‘ldirishga uringan. Bu haqda jurnalist Taker Karlson Mett Taybbi bilan suhbatda ma’lum qildi.

Uning so‘zlariga ko‘ra, AQShning sobiq davlat kotibi Entoni Blinken «haqiqiy urush»ni yoqlab chiqqan, Bayden ma’muriyati esa Rossiya prezidentini o‘ldirishga uringan.

Jurnalist ushbu rejalarni «telbalik» deb atagan va bunday holatda Rossiya hamda uning yadroviy arsenalini «kim nozorat qilardi?» degan savolni o‘rtaga tashlagan. Karlson o‘z so‘zlarini tasdiqlovchi biror-bir dalil keltirmagan.

Rossiya prezidentining matbuot kotibi Dmitriy Peskov amerikalik jurnalistning so‘zlariga munosabat bildirdi. «Rossiya maxsus xizmatlari doimiy ravishda jamoatchilik xavfsizligi va davlat himoyasi ostida bo‘lgan shaxslar, birinchi navbatda davlat rahbarining xavfsizligini ta’minlash maqsadida barcha zarur choralarni ko‘rib keladi», — deydi Peskov.

Eslatib o‘tamiz, amerikalik mashhur teleboshlovchi Taker Karlson 2024 yil 9 fevralga o‘tar kechasi o‘z saytida va Tvitterda Rossiya prezidenti Putin bilan 2 soatlik intervyusini e’lon qilgandi. Bu intervyu uchun Karlson bir necha kun oldin Moskvaga uchib kelgan.

Suhbatdan avval Karlson amerikaliklar Ukrainadagi urush haqida to‘liq tushunchaga ega bo‘lishi uchun Putinga o‘tkir savollar berishini aytgandi. Ammo Karlson intervyu davomida rossiyalik suhbatdoshiga noqulay savollar bera olmadi. Masalan, u Mariupol va Buchadagi harbiy jinoyatlar yoki Aleksey Navalniy haqida so‘ramagan.

#Jo Bayden #Taker Karlson