O‘zbekistonlik hamshiralar Qatarga ishga yuboriladi

Hamad Medical Corporation boshqaruvchi direktori Muhammad bin Xalifa Al-Suvaydiy O‘zbekiston Qatarning strategik hamkori va yuqori ishchi kuchi salohiyatiga ega davlat ekanini hamda mamlakat sog‘liqni saqlash tizimi kadrlarga bo‘lgan ehtiyojni qondirish uchun uzoq muddatli hamkorlikni yo‘lga qo‘yishdan manfaatdor ekanini ta’kidladi. 

Uning aytishicha, Hamad Medical Corporation turli profildagi 15 ta shifoxonani birlashtiradi. Ularda 35 mingdan ortiq xodim, jumladan, 12 ming hamshira ishlaydi. Ular har yili Qatar va mintaqaning boshqa davlatlaridan kelgan 3 milliondan ortiq bemorga xizmat ko‘rsatadi.

Hamad Medical Corporation vakillari agentlik faoliyati va O‘zbekistondagi tashqi mehnat migratsiyasi mexanizmlari, xalqaro hamkorlar bilan aloqalarning mavjud muvaffaqiyatli modellari bilan batafsil tanishdilar.

Muzokaralar natijasida malakali tibbiyot mutaxassislarini tanlash, ularning kasb va til o‘rganishi, ishchi vizalarini rasmiylashtirish, Dohaga kelishi, yashashi va Hamad Medical Corporation'da munosib mehnat sharoitlari bilan ta’minlanishi kabi masalalarni hal etish bo‘yicha qo‘shma ishchi guruh tuzish to‘g‘risida kelishuvga erishildi.